నేటి ఆధునిక జీవనశైలిలో బరువు తగ్గడం అనేది ఒక సవాల్గా మారింది. ఇందుకు కీటో డైట్, ఇంటర్మిటెంట్ ఫాస్టింగ్ వంటి ఎన్నో పద్ధతులు వాడుకలోకి వచ్చాయి. అయితే తాజాగా సోషల్ మీడియాలో ప్రతిరోజూ 1 కిలోమీటరు నడక అనే ట్రెండ్ విపరీతంగా కనిపిస్తోంది. తక్కువ శ్రమతో బరువు తగ్గొచ్చని భావించే వారికి ఇది ఆకర్షణీయంగా అనిపించవచ్చు. కానీ కేవలం ఒక కిలోమీటరు నడకతో ఆశించిన ఫలితాలు వస్తాయా? దీని వెనుక ఉన్న శాస్త్రీయత ఏమిటి? అ నే విషయాలు తెలుసుకోవాలి..
వ్యాయామమే కాదు.. ఒక గొప్ప ప్రారంభం
నడక అనేది శరీరానికే కాకుండా మనసుకూ మేలు చేసే అత్యంత సులభమైన వ్యాయామం. ఇది మిమ్మల్ని ప్రకృతికి దగ్గర చేయడమే కాకుండా ఒత్తిడిని తగ్గించి శరీరాన్ని చురుకుగా ఉంచుతుంది. నిపుణుల అభిప్రాయం ప్రకారం, అస్సలు వ్యాయామం చేయని వారు 1 కిలోమీటరుతో మొదలుపెట్టడం ఒక మంచి ఆరోగ్యకరమైన అలవాటుకు పునాది అని చెప్పవచ్చు.
లెక్కలు ఏం చెబుతున్నాయి?
ప్రముఖ పోషకాహార నిపుణురాలు డాక్టర్ గీతికా చోప్రా విశ్లేషణ ప్రకారం.. మనం తీసుకునే ఆహారంలో మార్పులు చేయకుండా కేవలం రోజుకు 1 కిలోమీటరు నడిస్తే వచ్చే ఫలితాలు చాలా స్వల్పం. రోజుకు 1 కి.మీ. నడిస్తే నెలకు సుమారు 1200 నుండి 2000 కేలరీలు ఖర్చవుతాయి. వైద్యపరంగా చూస్తే, దీనివల్ల నెలలో కేవలం 0.15 నుండి 0.25 కిలోగ్రాముల కొవ్వు మాత్రమే తగ్గుతుంది. అంటే అద్దంలో చూసుకున్నప్పుడు మీ రూపంలో ఎలాంటి మార్పు కనిపించదు.
బరువు తగ్గడాన్ని శాసించే అంశాలు ఇవే
కేవలం నడిచే దూరం మాత్రమే కాదు, బరువు తగ్గడం అనేది మరికొన్ని కీలక అంశాలపై ఆధారపడి ఉంటుంది:
నడక వేగం: మామూలుగా నడవడం కంటే బ్రిస్క్ వాకింగ్ వల్ల ఎక్కువ కేలరీలు ఖర్చవుతాయి.
జీవక్రియ: మీ మెటబాలిజం వేగాన్ని బట్టి కొవ్వు కరగడం ఆధారపడి ఉంటుంది.
ఆహార నియంత్రణ: నడిచిన తర్వాత ఆకలి వేస్తుందని ఎక్కువ కేలరీల ఆహారం తీసుకుంటే, నడక వల్ల వచ్చే ఫలితం సున్నా అవుతుంది.
ఆరోగ్య సమస్యలు: థైరాయిడ్ లేదా PCOS వంటి సమస్యలు ఉన్నవారిలో బరువు తగ్గడం నెమ్మదిగా ఉంటుంది.
నిపుణుల సలహా
మీరు కేవలం శరీరాన్ని చురుకుగా ఉంచుకోవాలనుకుంటే 1 కిలోమీటరు నడక సరిపోతుంది. కానీ బరువు తగ్గడమే మీ లక్ష్యం అయితే మాత్రం దూరాన్ని పెంచాలి. ఆరోగ్యకరమైన ఆహారంతో పాటు నడక దూరాన్ని క్రమంగా పెంచుతూ, వేగాన్ని పెంచడం ద్వారా మాత్రమే ఆశించిన ఫలితాలు వస్తాయని వైద్యులు సూచిస్తున్నారు.
