భారత ప్రభుత్వం ఓవర్సీస్ సిటిజన్ ఆఫ్ ఇండియా (OCI) కార్డుదారులు, పౌరసత్వ ప్రక్రియల్లో కీలక మార్పులు చేస్తూ పౌరసత్వ (సవరణ) నిబంధనలు, 2026ను అమల్లోకి తెచ్చింది. కేంద్ర హోం మంత్రిత్వ శాఖ గురువారం (ఏప్రిల్ 30) విడుదల చేసిన గెజిట్ నోటిఫికేషన్ ప్రకారం, ఈ సవరణలు ప్రధానంగా డిజిటలైజేషన్, పారదర్శకతపై దృష్టి సారించాయి.
కొత్త నిబంధనల ప్రకారం, OCI నమోదు, కార్డును వదులుకునే ప్రక్రియ ఇకపై పూర్తిగా ఆన్లైన్ పోర్టల్ ద్వారానే జరుగుతుంది. దీనివల్ల డూప్లికేట్ పత్రాలను సమర్పించాల్సిన అవసరం తొలగిపోయింది. ప్రభుత్వం ఇ-OCI (e-OCI) వ్యవస్థను ప్రవేశపెట్టింది, దీని ద్వారా దరఖాస్తుదారులు డిజిటల్ పత్రాన్ని పొందవచ్చు లేదా అవసరమైతే ఫిజికల్ కార్డును తీసుకోవచ్చు. ఒకవేళ ఎవరైనా OCI ని వదులుకుంటే, వారు తమ ఒరిజినల్ కార్డును సమీపంలోని భారతీయ మిషన్ లేదా ఫారిన్ రీజినల్ రిజిస్ట్రేషన్ ఆఫీసర్ (FRRO)కి సమర్పించాల్సి ఉంటుంది.
పిల్లలకు సంబంధించిన పౌరసత్వ దరఖాస్తుల విషయంలో ప్రభుత్వం ఒక కఠినమైన నిబంధనను చేర్చింది. “మైనర్ పిల్లలు ఏ ఇతర దేశపు పాస్పోర్ట్తో పాటు ఏకకాలంలో భారతీయ పాస్పోర్ట్ను కలిగి ఉండకూడదు.” ఇది పౌరసత్వ విషయంలో ఉన్న ద్వంద్వ పాస్పోర్ట్ గందరగోళాన్ని నివారిస్తుంది. ఒకవేళ ప్రభుత్వం OCI హోదాను రద్దు చేస్తే, కార్డును తిరిగి ఇవ్వడం తప్పనిసరి. కార్డు అప్పగించకపోయినా, డిజిటల్ రికార్డుల్లో ప్రభుత్వం దానిని రద్దు చేసే అధికారం కలిగి ఉంటుంది. అయితే, దరఖాస్తు తిరస్కరణకు గురైన వారికి ఊరటనిస్తూ, ఆ నిర్ణయాన్ని సవాలు చేసే హక్కును కల్పించారు. ఇటువంటి కేసులను ఇప్పుడు నిర్ణయం తీసుకున్న అధికారి కంటే ఒక స్థాయి పైనున్న అధికారి సమీక్షిస్తారు.
1955 పౌరసత్వ చట్టానికి సవరణ చేస్తూ 2005లో OCI పథకాన్ని ప్రారంభించారు. భారత సంతతికి చెందిన విదేశీయులకు ఇది భారతదేశంతో శాశ్వత సంబంధాన్ని కల్పిస్తుంది. అయితే, పాకిస్తాన్ లేదా బంగ్లాదేశ్ పౌరసత్వ నేపథ్యం ఉన్న వారికి ఈ పథకం వర్తించదు. తాజా సవరణలు ప్రవాస భారతీయులకు సేవలను మరింత వేగవంతం మరియు సులభతరం చేయనున్నాయి.
మరిన్ని జాతీయ వార్తల కోసం ఇక్కడ క్లిక్ చేయండి..
