జిమ్లో వ్యాయామం చేయడం ఆరోగ్యానికి మంచిదే అయినప్పటికీ, పరిమితికి మించిన వర్కౌట్స్ తీవ్రమైన ప్రమాదానికి దారితీస్తాయి. వ్యాయామం చేసిన తర్వాత మూత్రం ముదురు గోధుమ రంగులోకి మారడం తీవ్రమైన హెచ్చరిక సంకేతం. దీనివల్ల కిడ్నీలు దెబ్బతినే ప్రమాదం ఉంది. వర్కౌట్ తర్వాత ఇలాంటి మార్పు గమనిస్తే వెంటనే వైద్యుడిని సంప్రదించి, తగినంత నీరు తాగడం అత్యవసరం.
డార్క్ బ్రౌన్ మూత్రం – అసలు కారణం ఏంటి?:
జిమ్ వర్కౌట్ తర్వాత మీ మూత్రం ముదురు గోధుమ రంగులోకి అంటే టీ లేదా థమ్స్ అప్ రంగులోకి మారినట్లయితే, అది సాధారణ డీహైడ్రేషన్ మాత్రమే కాకపోవచ్చు. వైద్య పరిభాషలో దీనిని ర్యాబ్డోమైయోలిసిస్ అంటారు.
మనం పరిమితికి మించి బరువులు ఎత్తినప్పుడు లేదా కఠినమైన వ్యాయామాలు చేసినప్పుడు కండరాల కణాలు తీవ్రంగా దెబ్బతిని విచ్ఛిన్నమవుతాయి. ఆ సమయంలో కండరాలలోని మైయోగ్లోబిన్ అనే ప్రొటీన్ రక్తంలోకి విడుదలవుతుంది. ఈ ప్రొటీన్ రక్తప్రసరణ ద్వారా మూత్రపిండాలకు చేరుకున్నప్పుడు, కిడ్నీలు దానిని వడపోయడానికి తీవ్రంగా శ్రమిస్తాయి. ఈ క్రమంలో మూత్రం రంగు పూర్తిగా మారిపోతుంది.
ఇవి కూడా చదవండి
దీనివల్ల కలిగే ప్రమాదాలు:
రక్తంలోకి విపరీతంగా విడుదలయ్యే మైయోగ్లోబిన్ ప్రొటీన్ కిడ్నీలలోని చిన్న చిన్న నాళాలను పూడ్చివేస్తుంది. దీనిని సమయానికి గుర్తించి చికిత్స అందించకపోతే..
అక్యూట్ కిడ్నీ ఇంజ్యూరీ: మూత్రపిండాల పనితీరు ఒక్కసారిగా మందగించి, కిడ్నీ ఫెయిల్యూర్కు దారితీస్తుంది.
తీవ్రమైన కండరాల నొప్పులు: శరీరం తీవ్రంగా వాపునకు గురై, అసహనీయమైన కండరాల బలహీనత ఏర్పడుతుంది.
ఎలాంటి జాగ్రత్తలు తీసుకోవాలి?:
సామర్థ్యానికి మించి వర్కౌట్ చేయవద్దు: జిమ్లో మొదటిరోజే లేదా హఠాత్తుగా తీవ్రమైన బరువులు ఎత్తడం సరికాదు. కండరాలకు క్రమంగా అలవాటు చేయాలి.
హైడ్రేషన్ చాలా ముఖ్యం: వర్కౌట్ చేసే సమయంలో, ముందు, తర్వాత తగినంత నీరు, ఎలక్ట్రోలైట్స్ తాగుతుండాలి.
విశ్రాంతి అవసరం: ప్రతిరోజూ కఠిన వర్కౌట్స్ చేయకుండా వారంలో కనీసం 1-2 రోజులు శరీరానికి తగిన విశ్రాంతి ఇవ్వాలి.
వర్కౌట్ చేసిన తర్వాత మూత్రం ముదురు గోధుమ రంగులో రావడం, తీవ్రమైన కండరాల నొప్పులు ఉండటం గమనిస్తే ఆలస్యం చేయకుండా వెంటనే వర్కౌట్ ఆపివేసి డాక్టర్ను సంప్రదించాలి. సరైన సమయంలో నీరు తాగడం, వైద్య చికిత్స పొందడం వల్ల కిడ్నీలను ప్రమాదం నుండి కాపాడుకోవచ్చు.
మరిన్ని లైఫ్ స్టైల్ న్యూస్ కోసం క్లిక్ చేయండి..