కొండ, కోనలతో అలరారే అందమైన ఊళ్ళు, చుట్టూ పంట పొలాలు, ఉన్నంతలో కళకళలాడే లోగిళ్ళు, శ్రమైక సౌందర్యం ఉట్టిపడే చిరునవ్వు మోములు.. స్వయం సంవృద్దితో అభివృద్ది బాటలో పయనిస్తున్న గ్రామాలు.. పల్లె జీవనంలో ఇంతకన్నా ఇంకేం కావాలి. అనుకుంటూ సంతోషంగా జీవనం సాగిస్తున్న ఆ నల్లమల అడవి పుత్రుల జీవితాల్లోకి వెలిగొండ కోసం త్యాగాలు చేయాల్సిన తరుణం వచ్చింది. జనం కోసం, అభివృద్ది కోసం పుట్టిన ఊరిని, కట్టుకున్న ఇళ్ళను వదిలి ఊరు ఊరంతా తరలివెళ్ళారు. ఎవరికోసమో తమ సర్వస్యం త్యాగం చేశారు. ఇప్పుడు ఆ ఊళ్ళంతా నీటి గర్భంలో కలిసిపోతున్నాయి. మిగిలిన మొండి గోడలు తమ చరిత్రకు సాక్ష్యాలుగా మిగిలిపోతున్నాయి నాడు పట్టెడన్నం పెట్టిన భూమి నేడు కృష్ణమ్మ ఒడిలో సేదతీరుతోంది. బరువెక్కిన హృదయాలతో వెలిగొండ ముంపు గ్రామస్థులు తట్టాబుట్ట సర్దుకుని, పిల్లాపాపలతో తరలివెళ్ళిపోయారు.