ఎండలు మండిపోతున్నాయి. ఈ వేసవి తాపానికి చెమట పట్టడం సర్వసాధారణం. అయితే చాలా మందికి పట్టే అధిక చెమట వల్ల శరీర దుర్వాసన సమస్య తలెత్తుతుంది. చర్మంపై ఉండే బ్యాక్టీరియా చెమటతో చర్య జరిపినప్పుడు ఈ అసహ్యకరమైన వాసన వస్తుంది. ఈ వాసనను పోగొట్టుకోవడానికి చాలా మంది పెర్ఫ్యూమ్లు వాడుతుంటారు. కానీ అవి తాత్కాలికమే తప్ప సమస్యను శాశ్వతంగా పరిష్కరించవు. మీరు కూడా శరీర దుర్వాసనతో ఇబ్బంది పడుతుంటే, మీ స్నానపు నీటిలో ఈ సహజసిద్ధమైన పదార్థాలను కలిపి చూడండి. ఇవి మిమ్మల్ని రోజంతా తాజాగా ఉంచుతాయి.
దుర్వాసనను తరిమికొట్టే సహజ పదార్థాలు
వేప: వేపలో సహజసిద్ధమైన యాంటీ బాక్టీరియల్, యాంటీ ఫంగల్ గుణాలు ఉన్నాయి. ఇవి దుర్వాసనకు కారణమయ్యే సూక్ష్మజీవులను నాశనం చేసి చర్మాన్ని శుభ్రపరుస్తాయి. స్నానపు నీటిలో వేప ఆకులను లేదా వేప నూనెను కలుపుకోవడం వల్ల చర్మపు దురద, దద్దుర్లు, చికాకు కూడా తగ్గుతాయి.
నిమ్మకాయ: నిమ్మలోని సువాసన చెమట వాసనను సమర్థవంతంగా తగ్గిస్తుంది. బకెట్ నీటిలో నిమ్మరసాన్ని కలపడం లేదా నిమ్మ తొక్కలను నానబెట్టడం ద్వారా మంచి ఫలితం ఉంటుంది. నిమ్మ ఎసెన్షియల్ ఆయిల్ కూడా వాడవచ్చు.
బేకింగ్ సోడా: స్నానపు నీటిలో చిటికెడు బేకింగ్ సోడా కలపడం వల్ల శరీర దుర్వాసన తగ్గడమే కాకుండా చర్మం మృదువుగా మారుతుంది.
రోజ్ వాటర్: రోజ్ వాటర్ లేదా గులాబీ రేకులను నీటిలో చేర్చడం వల్ల చర్మం పొడిబారకుండా ఉంటుంది. ఇది శరీరానికి సహజమైన మాయిశ్చరైజర్గా పనిచేస్తూ మంచి సువాసనను అందిస్తుంది.
పుదీనా: పుదీనా ఆకులు చెమట బ్యాక్టీరియాను నియంత్రించడంలో కీలక పాత్ర పోషిస్తాయి. స్నానం చేసిన తర్వాత తడి చర్మంపై పుదీనా ఆకును రుద్దడం వల్ల రోజంతా తాజాగా అనిపిస్తుంది.
స్నానం తర్వాత తీసుకోవాల్సిన జాగ్రత్తలు
కేవలం స్నానం చేయడమే కాకుండా ఆ తర్వాత కొన్ని నియమాలు పాటిస్తేనే దుర్వాసనను పూర్తిగా అరికట్టవచ్చు.
- స్నానం చేసిన తర్వాత శరీరాన్ని తువ్వాలుతో బాగా ఆరబెట్టుకోవాలి. తడి చర్మంపై బ్యాక్టీరియా వేగంగా వృద్ధి చెంది వాసనను మరింత తీవ్రతరం చేస్తుంది.
- వేసవిలో కాటన్ దుస్తులు ధరించడం ఉత్తమం. ఇవి చెమటను పీల్చుకోవడమే కాకుండా చర్మానికి గాలి తగిలేలా చేస్తాయి.
పెర్ఫ్యూమ్ లపై ఆధారపడకుండా ఇంట్లోనే లభించే ఈ సహజసిద్ధమైన వస్తువులను మీ స్నానపు నీటిలో చేర్చుకోవడం ద్వారా ఆరోగ్యకరమైన పద్ధతిలో శరీర దుర్వాసన సమస్యకు చెక్ పెట్టవచ్చు.
