నేటి కాలంలో జుట్టు రాలడం, తెల్లబడటం, పల్చబడటం వంటి జుట్టు సమస్యలు సర్వసాధారణంగా మారాయి. ఈ సమస్యలకు పరిష్కారంగా అనేక రసాయన ఉత్పత్తులు అందుబాటులో ఉన్నప్పటికీ, సహజసిద్ధమైన పద్ధతులకు ప్రాధాన్యత ఇవ్వడం ఉత్తమం. అలాంటి వాటిలో ఉల్లిపాయ రసం ఒకటి. ఉల్లిపాయలలో జుట్టు ఆరోగ్యానికి అవసరమైన పోషకాలు, ఖనిజాలు పుష్కలంగా ఉన్నాయి. అయితే, ఉల్లిపాయ రసాన్ని సరైన విధానంలో, తగిన పదార్ధాలతో కలిపి వాడినప్పుడే అద్భుతమైన ఫలితాలు లభిస్తాయని ఆయుర్వేద నిపుణులు చెబుతున్నారు.
ఉల్లిపాయ రసం ప్రయోజనాలు:
ఉల్లిపాయ రసం జుట్టు ఆరోగ్యాన్ని కాపాడటంలో కీలక పాత్ర పోషిస్తుంది. దీనిలో ఉండే సల్ఫర్ కంటెంట్, యాంటీఆక్సిడెంట్లు, యాంటీమైక్రోబియల్ లక్షణాలు అద్భుతమైన ప్రయోజనాలను అందిస్తాయి.
జుట్టు రాలడాన్ని నిరోధించడం: ఉల్లిపాయ రసంలోని సల్ఫర్ హెయిర్ ఫోలికల్స్ను పోషించి, జుట్టు రాలడాన్ని సమర్థవంతంగా తగ్గిస్తుంది. ఇది కెరాటిన్ ఆరోగ్యంగా ఉండటానికి తోడ్పడుతుంది.
జుట్టు పెరుగుదలను ప్రోత్సహించడం: సల్ఫర్ కొల్లాజెన్ ఉత్పత్తిని పెంచుతుంది, ఇది కొత్త జుట్టు పెరగడానికి సహాయపడుతుంది. అలాగే, తలలో రక్త ప్రసరణను మెరుగుపరుస్తుంది.
చుండ్రు నివారణ: దీనిలోని యాంటీమైక్రోబియల్, యాంటీబాక్టీరియల్ లక్షణాలు చుండ్రుకు కారణమయ్యే ఫంగస్, బ్యాక్టీరియాను నిరోధించి, స్కాల్ప్ను శుభ్రంగా ఉంచుతాయి.
తెల్ల జుట్టు నివారణ: ఉల్లిపాయ రసంలోని యాంటీఆక్సిడెంట్లు జుట్టు అకాలంగా తెల్లబడటాన్ని తగ్గించి, సహజ రంగును కాపాడతాయి.
జుట్టుకు మెరుపు, మృదుత్వం: ఉల్లిపాయ రసం జుట్టును మృదువుగా, మెరిసేలా చేస్తుంది, దీనివల్ల జుట్టు చిట్లిపోవడం తగ్గుతుంది.
ఉల్లిపాయ రసం తయారీ, వాడే విధానం:
ఉల్లిపాయ రసాన్ని తయారు చేయడానికి, మీడియం సైజులో ఉన్న పింక్ ఉల్లిపాయలను ఎంచుకోవాలి. సుమారు నాలుగు ఉల్లిపాయలను పొట్టు తీసి, చిన్న ముక్కలుగా కట్ చేసి మిక్సీలో వేసి మెత్తగా గ్రైండ్ చేసుకోవాలి. ఈ పేస్ట్ను ఒక కాటన్ క్లాత్లో వేసి గట్టిగా పిండి రసాన్ని సేకరించాలి. ఈ రసాన్ని స్ప్రే బాటిల్లో లేదా గాజు సీసాలో నిల్వ చేసుకోవచ్చు. అయితే, తాజాగా తయారు చేసుకున్న రసం ఉత్తమ ఫలితాలను ఇస్తుంది.
ముఖ్య గమనిక: ప్యాచ్ టెస్ట్:
ఉల్లిపాయ రసాన్ని నేరుగా తలకు పట్టించే ముందు ప్యాచ్ టెస్ట్ చేయడం చాలా ముఖ్యం. కొద్దిగా రసాన్ని చెవి వెనుక భాగంలో రాసి, ఒక గంట పాటు వదిలివేయాలి. ఎటువంటి దురద, మంట, ఇరిటేషన్ లేకపోతేనే వాడటానికి అనుకూలం అని అర్థం. సల్ఫర్ అధికంగా ఉండటం వల్ల కొంతమందికి చికాకు కలిగే అవకాశం ఉంది.
ఉల్లిపాయ రసాన్ని కలిపి వాడాల్సిన పదార్థాలు:
కొబ్బరి నూనెతో ఉల్లి రసం: జుట్టు పొడిబారి, రఫ్గా ఉన్నవారికి ఈ మిశ్రమం బాగా పనిచేస్తుంది. రెండు టేబుల్ స్పూన్ల కొబ్బరి నూనెలో ఒక స్పూన్ ఉల్లిపాయ రసం కలిపి, స్కాల్ప్కు బాగా మసాజ్ చేయాలి. ఇది జుట్టుకు తేమను అందించి, కుదుళ్లను బలపరుస్తుంది.
ఆముదం నూనెతో ఉల్లి రసం: జుట్టు పెరుగుదలను ప్రోత్సహించడానికి, బలహీనమైన జుట్టుకు ఆముదం నూనె అద్భుతమైనది. రెండు టేబుల్ స్పూన్ల ఆముదం నూనెలో ఒక స్పూన్ ఉల్లిపాయ రసం కలిపి తలకు మసాజ్ చేయాలి. ఇది జుట్టు రాలడాన్ని తగ్గించి, చుండ్రును తొలగించి, జుట్టుకు మెరుపును ఇస్తుంది. తెల్ల జుట్టు సమస్య ఉన్నవారికి కూడా ప్రయోజనకరం.
ఆమ్లా నూనెతో ఉల్లి రసం: జుట్టు పొడవుగా, ఒత్తుగా, సిల్కీగా, షైనీగా పెరగాలంటే ఆమ్లా నూనెను ఉపయోగించవచ్చు. రెండు టేబుల్ స్పూన్ల ఆమ్లా నూనెలో ఒక స్పూన్ ఉల్లిపాయ రసం కలిపి స్కాల్ప్కు పట్టించాలి. ఆమ్లాలోని విటమిన్లు, మినరల్స్ రక్త ప్రసరణను మెరుగుపరిచి, జుట్టు కుదుళ్లకు పోషణను అందిస్తాయి.
మెంతుల పేస్ట్తో ఉల్లి రసం: జుట్టు ఎక్కువగా రాలిపోతున్నా, చుండ్రు, పేల సమస్యలు ఉన్నా మెంతులు గొప్ప పరిష్కారం. ఒక టేబుల్ స్పూన్ మెంతులను రాత్రంతా నానబెట్టి, ఉదయాన్నే పేస్ట్ చేసుకోవాలి. ఈ పేస్ట్లో ఒక స్పూన్ ఉల్లిపాయ రసం కలిపి తలకు పట్టించి, ఒక గంట తరువాత షాంపూతో కడగాలి. ఉల్లిపాయ రసం పడదు అనుకునే వారికి ఈ పద్ధతి అనుకూలం. తలలో వేడి ఎక్కువగా ఉన్నవారు ఈ మిశ్రమంలో ఒకటి లేదా రెండు టేబుల్ స్పూన్ల పెరుగును కలుపుకోవచ్చు.
ఈ సహజసిద్ధమైన పద్ధతులను క్రమం తప్పకుండా పాటించడం ద్వారా ఆరోగ్యకరమైన, ఒత్తుగా, నల్లటి, దృఢమైన జుట్టును సొంతం చేసుకోవచ్చని పేర్కొంటున్నారు ఆయుర్వేద నిపుణులు.. అయితే, ఏమైనా సమస్యలతో బాధపడుతుంటే వైద్య నిపుణులను సంప్రదించడం మంచిది.
మరిన్ని లైఫ్స్టైల్ వార్తల కోసం ఇక్కడ క్లిక్ చేయండి..