మంచి జీవనం కొనసాగించేందుకు కొంతమంది ఉద్యోగం చేస్తారు, మరికొందరు వ్యాపారం చేస్తారు. సాధారణంగా ప్రతిదీ సజావుగా సాగుతుంటుంది. అయితే కొన్నిసార్లు అనుకోని సమస్యలు తలెత్తి ఆర్థిక పరిస్థితి కుదేలవుతుంది. వ్యాపారంలో నష్టాలు ఎదురవుతాయి, అభివృద్ధి మందగిస్తుంది. దీనికి అనేక కారణాలు ఉండొచ్చు. వాస్తు శాస్త్రం ప్రకారం.. ఇంటిలో లేదా వ్యాపార స్థలంలో ప్రతికూల శక్తి (నెగటివ్ ఎనర్జీ) పెరిగితే, అది మన ఆర్థిక స్థితిపై ప్రభావం చూపుతుందని నమ్మకం. అలాంటి ప్రతికూల శక్తిని తొలగించేందుకు వాస్తు శాస్త్రంలో కొన్ని సులభమైన పరిహారాలు సూచించబడ్డాయి. వాటిలో ముఖ్యమైనవి ఇప్పుడు తెలుసుకుందాం.
1) పదకొండు రోజుల పరిహారం
మీ వ్యాపారం పదే పదే నష్టాలను ఎదుర్కొంటుంటే లేదా అభివృద్ధి లేక ఇబ్బందుల్లో ఉంటే, వరుసగా పదకొండు రోజులు కమలం పువ్వును నీటిలో నానబెట్టాలి. పన్నెండవ రోజు ఆ నీటిని మీ వ్యాపార స్థలంలోని బ్రహ్మస్థానం (మధ్య భాగం)పై చల్లాలి. బ్రహ్మస్థానం అనేది ఆ ప్రదేశానికి ఖచ్చితమైన మధ్య బిందువు. ఈ పరిహారం ద్వారా ప్రతికూల శక్తి తొలగి, వ్యాపారంలో సానుకూల మార్పులు వస్తాయని చెబుతారు.
2) సాయంత్రం దీపం వెలిగించడం
ప్రతి సాయంత్రం మీ దుకాణం లేదా కార్యాలయం ముందు దీపం వెలిగించడం శుభప్రదంగా భావిస్తారు. దీని ద్వారా లక్ష్మీ దేవి ఆశీస్సులు లభిస్తాయని నమ్మకం. ఆమె అనుగ్రహంతో వ్యాపారం అభివృద్ధి చెందుతుందని విశ్వసిస్తారు.
3) దిశల ప్రకారం చిత్రాల ఏర్పాటు
వ్యాపార శ్రేయస్సు కోసం దుకాణం లేదా కార్యాలయంలో దిశలను అనుసరించి దేవతల చిత్రాలను ఏర్పాటు చేయాలని వాస్తు సూచిస్తుంది.
- తూర్పు దిశలో సూర్య దేవుని చిత్రం ఉంచాలి.
- ఉత్తర దిశలో కుబేర దేవుని చిత్రం ఉంచాలి.
- లక్ష్మీదేవి విగ్రహం లేదా చిత్రం ఉంచి, క్రమం తప్పకుండా పూజ చేయాలి.
ఈ పరిహారాలు విశ్వాసంపై ఆధారపడినవే అయినప్పటికీ.. స్థల పరిశుభ్రత, సానుకూల వాతావరణం, నియమిత పూజలు మనసుకు ధైర్యం, నమ్మకం కలిగిస్తాయి. సానుకూల ఆలోచనతో పాటు కృషి, ప్రణాళిక, సమర్థ నిర్వహణ ఉంటే వ్యాపారం మరింత మెరుగ్గా ఎదుగుతుంది.
(Disclaimer: ఈ వార్తలోని సమాచారం జ్యోతిష్యం, మత విశ్వాసాలపై ఆధారపడి ఉంది. దీనిని టీవీ9 తెలుగు ధృవీకరించదు.)
