ఆర్థిక లావాదేవీలకు కీలక పత్రంగా మారిన పాన్ (PAN) కార్డ్ను పొందడం ఇప్పుడు చాలా సులభమైంది. ఆదాయపు పన్ను శాఖ డిజిటల్ సేవలను విస్తరించడంతో, ఇంటి నుంచే కొద్ది నిమిషాల్లో పాన్ కోసం దరఖాస్తు చేసుకునే అవకాశం అందుబాటులో ఉంది. ప్రస్తుతం పాన్ కార్డ్ పొందేందుకు ప్రధానంగా రెండు మార్గాలు ఉన్నాయి. ఆన్లైన్, ఆఫ్లైన్. ఆన్లైన్ విధానం వేగవంతమైనదిగా భావిస్తున్నారు. ఇందుకోసం అధికారిక పోర్టల్లోకి వెళ్లి ఫారం 49A నింపాలి. ఆధార్ ఆధారిత ఈ-కేవైసీ (e-KYC) ఎంపికను ఉపయోగిస్తే డాక్యుమెంట్లు అప్లోడ్ చేసే పని కూడా తగ్గుతుంది. అవసరమైన ఫీజు చెల్లించిన తర్వాత దరఖాస్తు సమర్పించవచ్చు. సాధారణంగా ఈ-పాన్ కొద్ది రోజుల్లో ఇమెయిల్కు వస్తుంది.
ఆఫ్లైన్ విధానాన్ని ఇష్టపడే వారు సమీపంలోని పాన్ సేవా కేంద్రంలో ఫారం సమర్పించవచ్చు. ఫోటోలు, గుర్తింపు రుజువు, చిరునామా రుజువు జత చేసి అప్లికేషన్ ఇవ్వాలి. ఈ విధానం కొంచెం ఎక్కువ సమయం పడుతుందని అధికారులు చెబుతున్నారు. త్వరగా పాన్ పొందాలంటే కొన్ని జాగ్రత్తలు అవసరం. దరఖాస్తులో పేరు, జనన తేదీ, ఆధార్ వివరాలు తప్పులేకుండా ఇవ్వాలి. మొబైల్ నంబర్ ఆధార్కు లింక్ అయి ఉండాలి. అలాగే ఒక వ్యక్తికి ఒకే పాన్ మాత్రమే అనుమతించబడుతుందని గుర్తుంచుకోవాలి.
ముఖ్యంగా ఆదాయపు పన్ను రిటర్నులు దాఖలు చేయడం, బ్యాంక్ ఖాతాలు తెరవడం, పెద్ద మొత్తాల లావాదేవీలు చేయడం వంటి పనులకు పాన్ తప్పనిసరి అయింది. కాబట్టి ఇంకా పాన్ కార్డ్ తీసుకోని వారు ఆలస్యం చేయకుండా ఆన్లైన్ ద్వారా దరఖాస్తు చేయడం ఉత్తమమని నిపుణులు సూచిస్తున్నారు.
మరిన్ని టెక్ వార్తల కోసం ఇక్కడ క్లిక్ చేయండి
