ఆవాలు కేవలం టేస్ట్కు మాత్రమే కాదు మన శరీరానికి అనేక ప్రయోజనాలను కూడా అందిస్తాయి. వీటిలో ఉండే పోషకాలు మన జీర్ణక్రియ మెరుపర్చడంలో అద్భుతంగా పనిచేస్తాయి. ఇవి జీర్ణరసాలను, ఎంజైమ్లను బాగా ఉత్పత్తి చేసి ఆకలిని పెంచుతాయి. తీసుకున్న ఆహారం సక్రమంగా జీర్ణం కావడానికి దోహదపడతాయి. ఆహార పదార్థాల్లోని హానికరమైన రసాయనాలను లేదా విష పదార్థాలను డీటాక్సిఫై చేయడంలో కూడా ఆవాలు సహాయపడతాయి. అందుకే మన పెద్దలు పోపులలో ఆవాలను వాడటం ఒక సంప్రదాయంగా మార్చారు.
కండరాల బలహీనత: మూత్రాశయ బలహీనత లేదా కండరాల బలహీనత కారణంగా మూత్రాన్ని అదుపు చేసుకోలేని వారికి ఇది ప్రయోజనకరంగా ఉంటుంది. రాత్రి భోజనం చేసేటప్పుడు మొదటి ముద్దలో 1 నుండి 2 గ్రాముల తేలికపాటిగా వేయించిన ఆవాల పొడిని కలిపి తీసుకోవాలి. దీన్ని రోజుకు ఒకసారి, మధ్యాహ్నం భోజనంలో కూడా తీసుకోవచ్చు. దీన్ని క్రమం తప్పకుండా పాటిస్తే మార్పు మీరు చూస్తారు.
నిద్రలో మూత్ర విసర్జన: సాధారణంగా చిన్న పిల్లల్లో కొంత వయస్సు వచ్చే వరకు నిద్రలోనే మూత్ర విసర్జన చేస్తుంటారు. అయితే వయస్సు వచ్చిన తర్వాత కూడా ఈ సమస్య ఎదుర్కొనే వారికి ఆవాల పొడి అద్భుతంగా పనిచేస్తుంది. ఇందుకోసం 1 గ్రాము వేయించిన ఆవాల పొడిని 50 ml గోరువెచ్చని పాలలో కలిపి ఉదయం, రాత్రి పడుకునే ముందు తీసుకోవడం వల్ల మూత్రాశయ కండరాలు దృఢపడి, సమస్య తగ్గుతుంది.
విరేచనాలు: డీహైడ్రేషన్ కు దారితీసే తీవ్రమైన నీళ్ళ విరేచనాల సమస్యకు ఆవాలు తక్షణ ఉపశమనం అందిస్తాయి. 50 ml గోరువెచ్చని నీటిలో 1 నుండి 2 గ్రాముల ఆవాలను కలిపి రోజుకు రెండు లేదా మూడు సార్లు తీసుకోవాలి. మొదటి రెండు డోసుల్లోనే ప్రేగుల్లోని చలనం తగ్గి, విరేచనాలు అదుపులోకి వచ్చి, ఇన్ఫెక్షన్లు కూడా తగ్గుతాయి.
మోకాళ్ల నొప్పులు: మోకాళ్ల నొప్పులకు పైపూత మందుగా ఆవాలు చక్కటి పరిష్కారం. ఒక భాగం వేయించి పొడి చేసిన ఆవపిండిని నాలుగు భాగాలు ఆముదంతో కలిపి, కాస్త వెచ్చచేసి మోకాళ్ల భాగంలో అప్లై చేయాలి. ఒక గంట తర్వాత గోరువెచ్చని నీటితో కడిగేయవచ్చు. రాత్రి పూట అప్లై చేసి ఉదయం కడిగేసినా మంచి ఫలితాలు ఉంటాయి. ఇది తక్షణ ఉపశమనం అందిస్తుంది, ఖర్చు తక్కువ, ఎటువంటి దుష్ప్రభావాలు ఉండవని డాక్టర్ శర్మ స్పష్టం చేశారు. మందులు వాడటానికి సంకోచించే వారికి ఇది ఒక మంచి సహజ పరిష్కారం.(Note: పైన పేర్కొన్న అంశాలు కేవలం అవగాహన కోసం మాత్రమే అందించబడినవి..వీటిని టీవీ9 దృవీకరించట్లేదు)