కానీ, మనం రోజూ తీసుకునే కొన్ని రకాల కొవ్వు పదార్థాలు మన కాలేయాన్ని క్యాన్సర్ గురిచేస్తున్నాయని నిపుణులు హెచ్చరిస్తున్నారు. ఆరోగ్యం కోసం మనం తీసుకునే ఆహారంలో కొవ్వులు ఒక ముఖ్యమైన భాగం. అయితే, మీరు ఎంచుకునే ఆ కొవ్వు పదార్థమే మీ ప్రాణాల మీదకు తీసుకురావచ్చని మీకు తెలుసా? ముఖ్యంగా అధిక బరువు ఉన్నవారిలో కొన్ని రకాల కొవ్వులు కాలేయంలో ట్యూమర్ల వృద్ధిని వేగవంతం చేస్తున్నాయని తాజా పరిశోధనలు వెల్లడిస్తున్నాయి. మనం నిత్యం వాడే వెన్న, జంతు సంబంధిత కొవ్వులు మన కాలేయానికి ఎలా శత్రువులుగా మారుతున్నాయో, ప్రముఖ గ్యాస్ట్రోఇంటెస్టైనల్ సర్జన్ డాక్టర్ సౌరభ్ బన్సల్ పంచుకున్న షాకింగ్ విషయాలేంటో చూద్దాం..
లివర్ క్యాన్సర్ – స్థూలకాయం..
లివర్ క్యాన్సర్ లో అత్యంత సాధారణ రూపం ‘హెపటో సెల్యులార్ కార్సినోమా’ (HCC). ఇది స్థూలకాయం మరియు మెటబాలిక్ డిస్ఫంక్షన్ సంబంధిత ఫ్యాటీ లివర్ డిసీజ్ వల్ల వస్తుందని డాక్టర్ సౌరభ్ వివరించారు. కేవలం శరీర బరువు పెరగడం మాత్రమే కాదు, మనం ఎటువంటి కొవ్వులు తింటున్నామనేది క్యాన్సర్ ముప్పును నిర్ణయిస్తుంది. 2025లో ప్రచురితమైన పదేళ్ల సుదీర్ఘ అధ్యయనం ప్రకారం.. జంతువుల నుండి సేకరించిన కొవ్వులు స్థూలకాయం ఉన్నవారిలో ట్యూమర్ పెరుగుదలను గణనీయంగా పెంచుతున్నాయని తేలింది.
ఏ కొవ్వులు ప్రమాదకరం?
మనం రెగ్యులర్ గా వాడే వెన్న, పంది కొవ్వు, గొడ్డు మాంసం కొవ్వు వంటి జంతు సంబంధిత ఫ్యాట్స్ కాలేయ వ్యాధులకు ప్రధాన కారకాలుగా మారుతున్నాయి. ఇవి కేవలం బరువు పెంచడమే కాకుండా, కాలేయ కణాలలో క్యాన్సర్ కారక మార్పులను ప్రేరేపిస్తాయి.
కాలేయ ఆరోగ్యాన్ని కాపాడుకోవడానికి ప్లాంట్-బేస్డ్ (మొక్కల ఆధారిత) కొవ్వులను ఎంచుకోవాలని వైద్యులు సూచిస్తున్నారు. ఆలివ్ ఆయిల్, పామాయిల్ మరియు కొబ్బరి నూనె వంటివి అధిక బరువు ఉన్నప్పటికీ క్యాన్సర్ వృద్ధిని ప్రోత్సహించవని పరిశోధనల్లో తేలింది. వీటితో పాటు స్థిరంగా బరువు తగ్గడం ద్వారా ఫ్యాటీ లివర్ సమస్యను నయం చేసుకోవచ్చని, క్యాన్సర్ ముప్పును తగ్గించుకోవచ్చని నిపుణులు చెబుతున్నారు.
లివర్ క్యాన్సర్ ను అడ్డుకోవాలంటే కేవలం బరువు తగ్గితే సరిపోదు, మన డైట్ లో ఉండే కొవ్వుల మూలాన్ని కూడా గమనించాలి. జంతు సంబంధిత కొవ్వులను తగ్గించి, సహజ సిద్ధమైన మొక్కల ఆధారిత నూనెలను వాడటం ద్వారా కాలేయాన్ని రక్షించుకోవచ్చు. కాలేయం మీ శరీరానికి ఫిల్టర్ లాంటిది, దానిని ఆరోగ్యంగా ఉంచుకోవడం మీ చేతుల్లోనే ఉంది.
