IND vs WI : ఇంగ్లండ్ పర్యటనలో అద్భుత ప్రదర్శన తర్వాత, భారత జట్టు ఇప్పుడు సొంత గడ్డపై మళ్లీ క్రికెట్ ఆడనుంది. వరల్డ్ టెస్ట్ ఛాంపియన్‌షిప్ కొత్త సైకిల్‌లో భాగంగా వచ్చే నెలలో వెస్టిండీస్‌తో మొదటి హోమ్ సిరీస్ ఆడనుంది. అక్టోబర్ 2న ప్రారంభమయ్యే ఈ సిరీస్ కోసం భారత జట్టును నేడు (సెప్టెంబర్ 24) ఎంపిక చేయనున్నారు. ఆసియా కప్ 2025 ముగిసిన మూడు రోజులకే ఈ సిరీస్ ప్రారంభం కానుండటంతో, ఏ ఆటగాళ్లకు అవకాశం లభిస్తుందో అనే ఉత్కంఠ నెలకొంది.
అక్టోబర్ 2న ప్రారంభం కానున్న ఈ సిరీస్ కోసం, భారత జట్టును నేడు (సెప్టెంబర్ 24) సెలక్ట్ చేయనున్నారు. ఆసియా కప్ 2025 ముగిసిన మూడు రోజులకే ఈ సిరీస్ ప్రారంభం అవుతుండటంతో, ఏ ఆటగాళ్లకు ఈ టెస్ట్ సిరీస్‌లో అవకాశం లభిస్తుందో అనే ఆసక్తి అందరిలోనూ నెలకొంది. చీఫ్ సెలెక్టర్ అజిత్ అగార్కర్ అధ్యక్షతన బీసీసీఐ సీనియర్ మెన్స్ సెలక్షన్ కమిటీ బుధవారం ఆన్‌లైన్ సమావేశంలో 2 టెస్ట్ మ్యాచ్‌ల సిరీస్ కోసం జట్టును ఎంపిక చేస్తుంది.
హోమ్ సిరీస్‌ను దృష్టిలో ఉంచుకొని 15 మంది సభ్యుల స్క్వాడ్‌ను ఎంపిక చేసే అవకాశం ఉంది. అయితే, రెండు టెస్ట్ మ్యాచ్‌లకు ఒకేసారి స్క్వాడ్‌ను ప్రకటిస్తారా, లేదా ముందుగా మొదటి టెస్ట్‌కు మాత్రమే ఆటగాళ్లను ఎంపిక చేస్తారా అనేది ఇంకా స్పష్టం కాలేదు. ఈ సిరీస్‌లోని మొదటి టెస్ట్ మ్యాచ్ అక్టోబర్ 2న అహ్మదాబాద్‌లో, రెండో మ్యాచ్ అక్టోబర్ 10న న్యూఢిల్లీలో జరగనుంది.
ఈ సెలక్షన్‌కు ముందే ఒక పెద్ద ప్రశ్నకు సమాధానం లభించింది. మిడిల్ ఆర్డర్ స్టార్ బ్యాట్స్‌మెన్ శ్రేయస్ అయ్యర్ ఈ సిరీస్‌తో టెస్ట్ టీమ్‌లోకి తిరిగి వస్తారని ఊహాగానాలు వినిపించాయి. అయితే, సెలక్షన్‌కు ఒక రోజు ముందు వచ్చిన ఒక నివేదిక ప్రకారం, శ్రేయాస్ అయ్యర్ ప్రస్తుతం రెడ్ బాల్ క్రికెట్ నుండి బ్రేక్ తీసుకున్నారు. ఈ విషయాన్ని ఆయన సెలక్షన్ కమిటీతో పాటు బీసీసీఐకి కూడా తెలియజేశారు. దీంతో అయ్యర్ ఎంపికపై జరుగుతున్న చర్చ ముగిసినట్లే.
అలాగే, స్టార్ ఫాస్ట్ బౌలర్ జస్‌ప్రీత్ బుమ్రా గురించి కూడా ఒక ఆసక్తికరమైన వార్త వచ్చింది. ఆసియా కప్ 2025 లో టీమ్ ఇండియాలో సభ్యుడైన బుమ్రా, ఈ టెస్ట్ సిరీస్‌లో ఆడటానికి సిద్ధంగా ఉన్నారని, తన కోరికను బీసీసీఐకి తెలియజేశారని సమాచారం. టీమ్ ఇండియా ఆసియా కప్ ఫైనల్ ఆడితే, ఆ తర్వాత టెస్ట్ సిరీస్‌కు ఆటగాళ్లకు కేవలం 3 రోజుల విరామం మాత్రమే లభిస్తుంది. ఫైనల్ సెప్టెంబర్ 28న కాగా, మొదటి టెస్ట్ మ్యాచ్ అక్టోబర్ 2న ఉంది. కొన్ని వారాల క్రితం బుమ్రా వర్క్‌లోడ్ మేనేజ్‌మెంట్‌పై పెద్ద చర్చ జరిగిన నేపథ్యంలో ఆయన ఈ నిర్ణయం సెలక్షన్‌కు కొత్త కోణాన్ని జోడించింది.
ఈ ఆటగాళ్లపై కన్ను
దాదాపు 8 ఏళ్ల సుదీర్ఘ నిరీక్షణ తర్వాత కరుణ్ నాయర్ టీమ్ ఇండియాలోకి తిరిగి వచ్చారు. అయితే, ఇంగ్లండ్ పర్యటనలో టెస్ట్ సిరీస్‌లో లభించిన అవకాశాలను ఆయన సద్వినియోగం చేసుకోలేకపోయారు. 25 సగటుతో కేవలం 205 పరుగులు మాత్రమే చేయగలిగారు. దీంతో ఆయనను మళ్లీ జట్టులోకి ఎంపిక చేయడం కష్టంగా కనిపిస్తోంది. దులీప్ ట్రోఫీ, ఆస్ట్రేలియా ‘ఎ’ జట్టుపై అద్భుత ప్రదర్శన కనబరిచిన యువ బ్యాట్స్‌మెన్ దేవదత్ పడిక్కల్ తిరిగి జట్టులోకి వచ్చే అవకాశం ఉంది. స్పిన్-ఆల్ రౌండర్ అక్షర్ పటేల్ కూడా టెస్ట్ జట్టులోకి తిరిగి వచ్చే అవకాశం ఉంది. ఈ సెలక్షన్ టీమ్ ఇండియా భవిష్యత్తుకు చాలా కీలకమైనది, యువ ఆటగాళ్లకు అవకాశం కల్పించడంపై సెలక్టర్లు దృష్టి సారించవచ్చు.
మరిన్ని క్రికెట్ వార్తల కోసం ఇక్కడ క్లిక్‌ చేయండి..
