హైదరాబాద్ నగరంలో మరో కల్తీ ఆహార తయారీ కేంద్రం బట్టబయలైంది. ఖైరతాబాద్ జోన్ టాస్క్ ఫోర్స్ బృందం విశ్వసనీయ సమాచారం మేరకు లేక్ పోలీస్ స్టేషన్ పరిధిలోని ఎం.ఎస్. మఖ్తా రైల్వే గేట్ సమీపంలోని ఇంటిపై ఆకస్మిక తనిఖీలు నిర్వహించగా, అత్యంత అపరిశుభ్రమైన వాతావరణంలో మానవ ఆరోగ్యానికి హానికరంగా అల్లం–వెల్లుల్లి పేస్ట్ తయారు చేస్తున్న వ్యవహారం వెలుగులోకి వచ్చింది.
అబిడ్స్కు చెందిన జసాని ఇల్యాన్ ‘JJ ఫుడ్స్’ పేరుతో ఈ వ్యాపారం నిర్వహిస్తూ గడువు ముగిసిన FSSAI లైసెన్స్ ను ఉపయోగించి హోటళ్లు, కిరాణా దుకాణాలకు సరఫరా చేస్తున్నట్లు పోలీసులు తెలిపారు. తయారు చేసిన పేస్ట్ను బహిరంగ ప్లాస్టిక్ టబ్బుల్లో నిల్వ చేయడం వల్ల ధూళి, ఈగలు, ఇతర కలుషితాలు చేరి అది వినియోగానికి ప్రమాదకరంగా మారిందని అధికారులు పేర్కొన్నారు.
తనిఖీల్లో మొత్తం 4 వేల కేజీల కల్తీ పేస్ట్ను స్వాధీనం చేసుకున్నారు. వీటిలో 40 టబ్బుల్లో 1,600 కేజీలు, 5 కేజీల కంటైనర్లు 130 , 1 కేజీ కంటైనర్లు 900, 500 గ్రాముల కంటైనర్లు 300, 200 గ్రాముల కంటైనర్లు 3,000 , 50 గ్రాముల ప్యాకెట్లు 2,000 ఉన్నాయి. అదేవిధంగా రెండు గ్రైండింగ్ మెషీన్లు, 5 కేజీల పసుపు పొడి, 20 లీటర్ల ఎసిటిక్ యాసిడ్, 40 బస్తాల ఉప్పు సరఫరాకు వినియోగిస్తున్న గూడ్స్ ఆటోను సీజ్ చేశారు. నిందితుడిని తదుపరి చట్టపరమైన చర్యల కోసం లేక్ పోలీస్ స్టేషన్ ఎస్హెచ్ఓకు అప్పగించినట్లు అధికారులు వెల్లడించారు.
మరిన్ని తెలంగాణ వార్తల కోసం ఇక్కడ క్లిక్ చేయండి.
