జంతు సంక్షేమం ప్రపంచవ్యాప్తంగా ఒక ముఖ్యమైన అంశంగా మారింది. ఈ విషయంలో వినియోగదారులు, సంస్థలు ఎలా కలిసి పని చేయగలవో స్వీడెన్ చూపించింది. చాలా దేశాలు పెంపకం పరిస్థితులను నియంత్రించడానికి చట్టాలపై ఆధారపడతాయి. అయితే, ఒక దేశం చట్టపరమైన నిషేధం లేకుండానే బోను పెంపకాన్ని పూర్తిగా తొలగించింది. అన్ని కోళ్లను స్వేచ్ఛగా పెంచుతుంది.
బోను లేని కోళ్ల పెంపకం
పశుసంక్షేమ సంస్థ ‘ప్రాజెక్ట్ 1882’ ప్రకారం, స్వీడెన్ లో ఇప్పుడు కోడిగుడ్లు పెట్టే కోళ్లు బోనులలో ఉండవు. ఇది చట్టపరమైన నిషేధం లేకుండానే సాధించిన ఒక గొప్ప మైలురాయి.
ప్రచారం ప్రారంభం
1988లో స్వీడిష్ పార్లమెంట్ మొదట బోను పెంపకం వ్యవస్థలను నిషేధించాలని ఓటు వేసింది. కానీ ఆ హామీని పాటించలేదు. 2000ల ప్రారంభంలో ‘ప్రాజెక్ట్ 1882’ తన ప్రచారం ప్రారంభించినప్పుడు, స్వీడెన్ లో దాదాపు 40% కోళ్లు బోనులలో ఉండేవి. అప్పటి నుండి, రిటైలర్లు, ఫుడ్ సర్వీస్ చైన్ లతో సహా 85కి పైగా కంపెనీలు బోనుల్లో పెంచే కోళ్ల గుడ్లను సరఫరా చేయకుండా దశలవారీగా నిలిపివేయడానికి కట్టుబడ్డాయి.
ప్రాజెక్ట్ 1882 ప్రకారం 2024 నాటికి బోను ఆధారిత పెంపకం 1% కంటే తక్కువగా తగ్గింది. 2025 నాటికి అన్ని బోనులు ఖాళీ అయ్యాయి. 2008 నుండి ఇప్పటి వరకు 1.7 కోట్ల కోళ్లకు స్వేచ్ఛ లభించింది. వినియోగదారుల ఒత్తిడి, సంస్థల సహకారంతో ఈ మార్పు సాధ్యమైందని నిపుణులు చెబుతున్నారు. భవిష్యత్తులో ఈ పురోగతి వెనక్కి వెళ్లకుండా ఉండాలంటే, బోనుల పెంపకంపై చట్టపరమైన నిషేధం విధించాలని ప్రాజెక్ట్ 1882 కోరుతుంది.
