Asia Cup 2025 : చరిత్ర సృష్టించడానికి వేదిక సిద్ధమైంది. 41 ఏళ్ల ఆసియా కప్ చరిత్రలో తొలిసారిగా, టైటిల్ కోసం దాయాదులైన భారత్, పాకిస్థాన్ తలపడనున్నాయి. సెప్టెంబర్ 28న దుబాయ్ ఇంటర్నేషనల్ క్రికెట్ స్టేడియంలో జరగనున్న ఈ పోరు కోసం ప్రపంచ క్రికెట్ అభిమానులంతా ఎంతో ఉత్కంఠగా ఎదురుచూస్తున్నారు. ఆసియా కప్ ఫైనల్‌లో ఈ రెండు జట్లు తలపడటం ఇదే మొదటిసారి అయినప్పటికీ, గతంలో అనేక అంతర్జాతీయ టోర్నమెంట్ల ఫైనల్స్‌లో మాత్రం వీటి మధ్య హోరాహోరీ పోరు జరిగింది.
ఆసియా కప్ 2025 ఫైనల్‌తో క్రికెట్ ప్రపంచం మొత్తం దుబాయ్ వైపు చూస్తోంది. భారత్, పాకిస్థాన్‌ల మధ్య జరగనున్న ఈ ఫైనల్, ఈ టోర్నమెంట్ చరిత్రలోనే మొట్టమొదటిది కావడం విశేషం. అంతర్జాతీయ టోర్నమెంట్ల ఫైనల్స్‌లో ఈ దాయాదుల మధ్య ఇప్పటివరకు జరిగిన పోరాటాలు, ఆసియా కప్‌లో ఇరు జట్ల రికార్డులు, అలాగే తుది పోరు కోసం సిద్ధమవుతున్న అంచనా ప్లేయింగ్ ఎలెవన్‌ గురించి ఈ వార్తలో తెలుసుకుందాం.
అంతర్జాతీయ ఫైనల్స్‌లో దాయాదుల పోరు
హెడ్-టు-హెడ్ ఫైనల్స్ రికార్డు :
ఆసియా కప్ ఫైనల్ మొదటిసారి జరుగుతున్నప్పటికీ భారత్, పాకిస్థాన్ అంతర్జాతీయ టోర్నమెంట్ల ఫైనల్స్‌లో ఇప్పటివరకు 5 సార్లు తలపడ్డాయి. ఈ ఐదు ఫైనల్స్‌లో భారత్ 2 విజయాలు సాధించగా, పాకిస్థాన్ 3 విజయాలు సాధించి కొంచెం పైచేయి సాధించింది.
1985 : మెల్‌బోర్న్‌లో జరిగిన వరల్డ్ ఛాంపియన్‌షిప్ ఆఫ్ క్రికెట్ ఫైనల్‌లో భారత్ 8 వికెట్ల తేడాతో పాకిస్థాన్‌ను ఓడించింది.
1986 & 1994 : ఆ తర్వాత రెండు సార్లు జరిగిన ఆస్ట్రల్-ఆసియా కప్ ఫైనల్స్‌లో పాకిస్థాన్ విజయం సాధించి ప్రతీకారం తీర్చుకుంది. 1986లో 1 వికెట్‌తో, 1994లో 39 పరుగుల తేడాతో పాక్ గెలిచింది.
2007 : క్రికెట్ చరిత్రలోనే ఉత్కంఠభరితమైన మ్యాచ్‌లలో ఒకటైన 2007 టీ20 ప్రపంచ కప్ ఫైనల్‌లో, జోహన్నెస్‌బర్గ్‌లో భారత్ 5 పరుగుల స్వల్ప తేడాతో గెలిచి టైటిల్ దక్కించుకుంది.
2017 : చివరగా, 2017 ఛాంపియన్స్ ట్రోఫీ ఫైనల్‌లో పాకిస్థాన్ 180 పరుగుల భారీ తేడాతో భారత్‌ను ఓడించింది.
ఆసియా కప్‌లో భారత్‌దే ఆధిపత్యం
టీ20 ఫార్మాట్‌లో పట్టు:
ఆసియా కప్ టోర్నమెంట్‌లలో మాత్రం భారత్ పాకిస్థాన్‌పై పూర్తి ఆధిపత్యాన్ని ప్రదర్శించింది. 2025 నాటికి ఈ రెండు జట్లు ఆసియా కప్‌లో మొత్తం 12 సార్లు తలపడగా, భారత్ 8 మ్యాచ్‌లలో గెలిచింది. పాకిస్థాన్ కేవలం 4 మ్యాచ్‌లలో మాత్రమే విజయం సాధించింది. ముఖ్యంగా టీ20 ఫార్మాట్‌లో భారత్ మరింత బలంగా కనిపిస్తోంది. ఈ హెడ్-టు-హెడ్ రికార్డు కారణంగానే ఆసియా కప్‌లో ఈ మ్యాచ్‌కు అంత ప్రాధాన్యత లభిస్తుంది.
ఫైనల్ కోసం అంచనా తుది జట్లు
బుమ్రా, హార్దిక్ పైనే దృష్టి:
ఈ చారిత్రాత్మక ఫైనల్ మ్యాచ్ కోసం ఇరు జట్ల మేనేజ్‌మెంట్లు తమ బలమైన తుది జట్లను రంగంలోకి దించాలని చూస్తున్నాయి. టీమిండియాలో జస్ప్రీత్ బుమ్రా, హార్దిక్ పాండ్యా తిరిగి జట్టులోకి వచ్చే అవకాశం ఉంది.
టీమిండియా తుది జట్టు :
శుభ్‌మన్ గిల్, అభిషేక్ శర్మ, సూర్యకుమార్ యాదవ్, తిలక్ వర్మ, సంజు శాంసన్, హార్దిక్ పాండ్యా, అక్షర్ పటేల్, కుల్దీప్ యాదవ్, వరుణ్ చక్రవర్తి, జస్ప్రీత్ బుమ్రా, అర్ష్‌దీప్ సింగ్.
పాక్ తుది జట్టు :
సాహిబ్‌జాదా ఫర్హాన్, ఫఖర్ జమాన్, సైమ్ అయూబ్, సల్మాన్ ఆగా (కెప్టెన్), హుస్సేన్ తలత్, మహ్మద్ హారిస్ (వికెట్‌కీపర్), మహ్మద్ నవాజ్, సుఫియాన్ ముఖీం, షహీన్ షా అఫ్రిది, హారిస్ రౌఫ్, అబ్రార్ అహ్మద్.
