జాలర్ల అరెస్టుకు ప్రధాన కారణం సరిహద్దుల ఉల్లంఘన. ప్రతి దేశానికి సముద్రంలో ప్రత్యేక ఆర్థిక మండలి (EEZ) ఉంటుంది. తీరం నుండి సుమారు 200 నాటికల్ మైళ్ల వరకు విస్తరించి ఉండే ఈ ప్రాంతంలో చేపల వేట, సముద్ర వనరుల వినియోగం హక్కులు ఆ దేశానికే చెందుతాయి. భారత జాలర్లు పొరపాటున ఈ సరిహద్దు దాటితే, ఆయా దేశాల కోస్ట్ గార్డ్ లు వారిని అరెస్టు చేస్తారు.
సాంకేతిక సమస్యలు
సముద్రంలో సరిహద్దులు స్పష్టంగా కనిపించవు. చేపల సమూహాలను వెంబడించే క్రమంలో లేదా అధునాతన GPS పరికరాలు సరిగా లేకపోవడం వల్ల జాలర్లు పొరపాటున సరిహద్దు దాటేస్తారు. పడవ ఇంజిన్లలో యాంత్రిక లోపాలు, వాతావరణం అనుకూలించకపోవడం వంటి పరిస్థితుల్లో కూడా వారు నియంత్రణ కోల్పోయి ఇతర దేశాల తీరాలకు కొట్టుకుపోతారు.
చేపల కోసం పోటీ
తీరానికి దగ్గరగా చేపల సంఖ్య తగ్గిపోతోంది. వనరుల కొరత వల్ల జాలర్లు మరింత ఎక్కువ చేపల కోసం లోతు సముద్రంలోకి వెళ్లాల్సి వస్తుంది. దీనివల్ల పొరుగు దేశాల సరిహద్దులకు దగ్గరగా వేట కొనసాగించక తప్పడం లేదు. కొన్నిసార్లు తరతరాలుగా చేపలు పడుతున్న ప్రాంతాలు కొత్త అంతర్జాతీయ చట్టాల కారణంగా నిషేధిత ప్రాంతాలు అవుతున్నాయి.
సరిహద్దులను ఇలా గుర్తిస్తారు..
1. GPS (గ్లోబల్ పొజిషనింగ్ సిస్టమ్)
ఇది సరిహద్దులను గుర్తించడంలో అతి ముఖ్యమైన సాధనం. జాలర్లు లేదా కోస్ట్ గార్డ్ లు ఈ సరిహద్దు పాయింట్లను వారి GPS పరికరంలో లేదా ఎలక్ట్రానిక్ చార్ట్ ప్లాటర్ లో నమోదు చేస్తారు. పడవ కదులుతున్నప్పుడు, GPS పరికరం పడవ ప్రస్తుత స్థానాన్ని ఆ సరిహద్దుకు సంబంధించి చూపిస్తుంది. సరిహద్దుకు దగ్గరగా వెళితే హెచ్చరికలు కూడా వస్తాయి.
2. ఎలక్ట్రానిక్ చార్ట్ ప్లాటర్ లు
ఈ పరికరాలలో సముద్ర పటాలు డిజిటల్ రూపంలో ఉంటాయి. పటంలో సరిహద్దు రేఖ స్పష్టంగా కనిపిస్తుంది. పడవ ఎక్కడ ఉందో సూచించే చిహ్నం ఈ పటంలో కనిపిస్తుంది. జాలర్లు తాము సరిహద్దుకు ఎంత దూరంలో ఉన్నారో చూసుకుంటూ జాగ్రత్తగా ప్రయాణం చేయవచ్చు.
3. రాడార్ వ్యవస్థ
సరిహద్దులు పర్యవేక్షించే పెద్ద నౌకలు, కోస్ట్ గార్డ్ లు ఈ సాంకేతికత ఉపయోగిస్తారు. రాడార్ సహాయంతో ఇతర పడవలను, తీరప్రాంతాలను దూరంగా ఉన్నా గుర్తించగలం. అనుమానాస్పదంగా సరిహద్దు దాటుతున్న పడవలను ట్రాక్ చేయడానికి ఇది ఉపయోగపడుతుంది.
సాధారణ జాలర్లకు సవాలు
చిన్న పడవల్లో చేపలు పట్టే చాలామంది జాలర్లు ఇప్పటికీ అధునాతన GPS వ్యవస్థలు వాడరు. వారు పాత పద్ధతుల పైన, దిక్సూచి పైన, తీరం నుండి దూరం అంచనా వేయడం పైన ఆధారపడతారు. అందుకే వారు తెలియకుండానే ఈ అదృశ్య “డెవిల్ లైన్” దాటుతారు.
ప్రభుత్వ జోక్యం
అరెస్టు జరిగిన తర్వాత ఆ దేశ చట్టాలను ఉల్లంఘించినట్లు పరిగణించి, జాలర్లపై క్రిమినల్ కేసులు పెడతారు. జాలర్లను విడుదల చేయించడానికి కేంద్ర విదేశాంగ శాఖ, రాష్ట్ర ప్రభుత్వం ఆయా దేశాల రాయబార కార్యాలయాల ద్వారా సంప్రదింపులు జరుపుతాయి. ఈ దౌత్య ప్రయత్నాల ద్వారా జరిమానాలు చెల్లించడం, చర్చలు జరపడం వంటి వాటితో జాలర్లను విడిపిస్తారు. తాజాగా ఏపీ ముఖ్యమంత్రి ఆదేశాల మేరకు ఎంపీ సానా సతీష్ బాబు రంగంలోకి దిగారు. ఈ సమస్యను ఆంధ్రప్రదేశ్ భవన్ కమిషనర్ డాక్టర్ అర్జా శ్రీకాంత్ దృష్టికి తీసుకెళ్లారు. వెంటనే ఇండియన్ కోస్ట్ గార్డ్ ప్రిన్సిపల్ డైరెక్టర్ పంకజ్ వర్మతో చర్చలు జరిపారు. వర్మ నేరుగా శ్రీలంక కోస్ట్ గార్డ్ కమాండర్ దినేష్ జేతో సంప్రదించడంతో కోర్టు అనుమతులు త్వరగా లభించాయి. కానీ, కొన్ని సార్లు జాలర్లను విడిపించడం అంత తేలిక కాదు. సముద్ర సరిహద్దులను గుర్తించడానికి, పర్యవేక్షించడానికి కేవలం ఆధునిక నావిగేషన్ పరికరాలు మాత్రమే ఉపయోగపడతాయి.
