వందల కొద్దీ వచ్చే ప్రమోషనల్ మెయిల్స్, స్పామ్ మెయిల్స్‌తో ఇన్‌బాక్స్ అంతా నిండిపోతుంటుంది. వీటిని ఏరోజుకారోజు డిలీట్ చేయడం కుదరని పని. అందుకే వీలున్నప్పుడల్లా ఒకేసారి అన్ని మెయిల్స్‌ను ఎలా డిలీట్ చేయాలో ఇప్పుడు చూద్దాం.
అన్ రీడ్ మెయిల్స్
జీమెయిల్‌లో ఒకేసారి కేవలం 50 మెయిల్స్‌ను మాత్రమే డిలీట్ చేసే వీలుంటుంది. అలా కాకుండా అన్నింటినీ ఒకేసారి డిలీట్ చేయాలంటే.. ఇలా చేయాలి.
- జీమెయిల్ డెస్క్‌టాప్ వెర్షన్‌లోకి వెళ్లి మెయిల్ సెర్చ్ బార్ లో ‘is:unread’ అని టైప్ చేయాలి.
- తర్వాత ‘సెలక్ట్ ఆల్’ మీద నొక్కితే 50 మెయిల్స్ సెలక్ట్ అవుతాయి.
- ఇప్పుడు పక్కనే కనిపిస్తున్న ‘సెలక్ట్ ఆల్ కన్వర్జేషన్స్ దట్ మ్యాచ్ దిస్ సెర్చ్(select all conversations that match this search)’ పైనొక్కితే.. చదవకుండా మిగిలిపోయిన మెయిల్స్ అన్నీ ఒకేసారి సెలక్ట్ అవుతాయి.
- తర్వాత డిలీట్ ఆప్షన్ నొక్కితే ‘కన్ఫర్మ్’ అని అడుగుతుంది.
- ‘ఓకే’ పై క్లిక్ చేస్తే అన్‌రీడ్ మెయిల్స్ అన్నీ డిలీట్ అవుతాయి. అయితే దీనికి రెండు మూడు నిముషాల టైం పడుతుంది.
సెర్చ్ ఫిల్టర్స్ ద్వారా..
ఇక దీంతోపాటు జీమెయిల్‌లో ఉన్న సెర్చ్ ఫిల్టర్స్ ఆధారంగా కూడా బల్క్‌లో మెయిల్స్ డిలీట్ చేయొచ్చు.
- సెర్చ్ బార్లో ఫైల్ సైజు అంటే 10ఎంబీ, 20 ఎంబీ.. ఇలా సైజు ఎంటర్ చేస్తే.. పెద్ద పెద్ద ఫైల్స్‌ ఉన్న మెయిల్స్ కనిపిస్తాయి. వాటిని సెలక్ట్ చేసి డిలీట్ చేయొచ్చు. దీనివల్ల స్టోరేజ్ త్వరగా క్లియర్ అవుతుంది.
- డేట్ ఫిల్టర్‌‌లో మీకు అవసరం లేవనుకున్న మెయిల్స్‌ను తేదీలు, సంవత్సరాల ఆధారంగా డిలీట్ చేసేయొచ్చు. ఉదాహరణకు డేట్ ఫిల్టర్ లో 2001 నుంచి 2023 వరకూ సెలక్ట్ చేసుకుని.. ఆ పాత మెయిల్స్ అన్నీ కనిపిస్తాయి. వాటిని సెలక్ట్ ఆల్ కొట్టి క్లియర్ చేయొచ్చు.
- జీమెయిల్ సెర్చ్ బార్లో ‘older_than:4y’ అని టైప్ చేస్తే నాలుగేళ్ల క్రితం వచ్చిన మెయిల్స్ అన్నీ చూపిస్తుంది. ఇప్పుడు వాటన్నింటినీ సెలక్ట్ చేసి డిలీట్ చేయొచ్చు. లేదా మూడేళ్ల క్రితం.. ఐదేళ్ల క్రితం ఇలా నచ్చినట్టుగా మెయిల్స్‌ను డిలీట్ చేయొచ్చు.
ఇవి కూడా..
ఇక వీటితోపాటు స్పామ్, ట్రాష్ ఫోల్డర్స్‌ను కూడా ఎప్పటికప్పుడు క్లియర్ చేస్తుంటే జీమెయిల్ క్లియర్‌‌గా ఉంటుంది. అలాగ మీ ఇన్ బాక్స్ లో వేటి నుంచి ఎక్కువ ప్రమోషనల్ మెయిల్స్ వస్తున్నాయో చూసుకుని ఆ మెయిల్ ఓపెన్ చేసి కింద అన్ సబ్ స్క్రైబ్ నొక్కితే.. ఇకపై ఆ మెయిల్స్ రాకుండా ఉంటాయి. అయితే జీమెయిల్ ను ఇలా క్లియర్ చేయడానికి కొంత సమయం పడుతుంది. ఇలా నాలుగైదు నెలలకోసారి చేసుకోవచ్చు.
మరిన్ని సైన్ అండ్ టెక్నాలజీ వార్తల కోసం ఇక్కడ క్లిక్ చేయండి..
