ప్రస్తుతం BBQ (బార్బెక్యూ) స్టైల్ గ్రిల్డ్ చికెన్ అంటే చాలామంది ఇష్టపడతారు. దీని ప్రత్యేకమైన రుచి, వాసన అందరినీ ఆకర్షిస్తుంది. ఈ రుచికరమైన వంటకాన్ని ఇంట్లోనే సులభంగా తయారు చేసుకోవచ్చు. అద్భుతమైన రుచి కోసం చికెన్ మ్యారినేషన్, బాస్టింగ్ పద్ధతులు చాలా ముఖ్యం.
తయారీకి కావలసినవి
చికెన్ లెగ్ లేదా బ్రెస్ట్ పీసులు, నిమ్మరసం. మ్యారినేషన్ కోసం అల్లం వెల్లుల్లి పేస్ట్, కారం, ఉప్పు, మిరియాల పొడి, జీలకర్ర పొడి, నూనె తీసుకోవాలి.
బాస్టింగ్ సాస్‌‌కు:
మీకు ఇష్టమైన రెడీమేడ్ BBQ సాస్ – 1 కప్పు (లేదా టొమాటో కెచప్, బ్రౌన్ షుగర్ కలిపి తయారుచేసుకోవచ్చు)
తయారీ పద్ధతి
ముందుగా చికెన్ పీసులను శుభ్రం చేయండి. వాటిపై నిమ్మరసం చల్లి గాట్లు పెట్టండి. గాట్ల వల్ల మసాలా లోపలి వరకు వెళుతుంది.
ఒక గిన్నెలో మ్యారినేషన్ కు కావలసిన పదార్థాలు వేసి బాగా కలపండి.
ఈ మసాలాను చికెన్ కు చక్కగా పట్టించాలి. చికెన్ కనీసం 3 నుండి 4 గంటలపాటు ఫ్రిజ్ లో మ్యారినేట్ చేయండి. రాత్రంతా మ్యారినేట్ చేస్తే రుచి మరింత పెరుగుతుంది.
గ్రిల్ ను మధ్యస్థం నుండి అధిక వేడికి వేడి చేయాలి. గ్రిల్ రాడ్స్ కు నూనె రాయండి.
చికెన్ పీసులను గ్రిల్ మీద ఉంచి, ప్రతి 5 నుండి 7 నిమిషాలకు తిప్పుతూ వేయించాలి. సుమారు 20 నుండి 30 నిమిషాల సమయం పడుతుంది.
చికెన్ ఉడికే దశకు చేరుకున్నప్పుడు, బ్రష్ సహాయంతో BBQ సాస్ ను చికెన్ కు రాయాలి. మరోసారి తిప్పి, మరో వైపు కూడా సాస్ రాయండి.
సాస్ రాసిన తర్వాత ఎక్కువసేపు ఉంచకుండా, చికెన్ తీయాలి. 5 నిమిషాలు ఆగిన తర్వాత వేడిగా వడ్డించాలి. దీనివల్ల చికెన్ మెత్తగా, జూసీగా ఉంటుంది.
