పతంజలి ఫుడ్స్ లిమిటెడ్ తన ఉత్పత్తుల ధరలను తగ్గిస్తున్నట్లు ప్రకటించింది. కేంద్ర ప్రభుత్వం ఇటీవల కొన్ని వస్తువులపై GSTని తగ్గించిందని, ఇప్పుడు వినియోగదారులు పూర్తి ప్రయోజనాన్ని పొందుతారని కంపెనీ పేర్కొంది. కొత్త ధరలు సెప్టెంబర్ 22 నుండి అమల్లోకి వస్తాయి. ఆహారం, పానీయాల నుండి మందులు, సబ్బులు, నూనెలు, సౌందర్య ఉత్పత్తుల వరకు ప్రతిదీ ఇందులో ఉన్నాయి. దీంతో పతంజలి ఉత్పత్తులు ఇప్పుడు మరింత చౌకగా మారనున్నాయి.
ఆహార పదార్థాలు అందుబాటు ధరల్లోకి..
మీరు పతంజలి సోయా ఉత్పత్తులను ఉపయోగిస్తే, ఇప్పుడు మీకు అవి తక్కువ ధరకే దొరుకుతాయి. న్యూట్రెలా, సోయుమ్ బ్రాండ్ల 1 కిలో ప్యాక్‌ల ధర 10 నుండి 20 రూపాయలు తగ్గింది. బిస్కెట్లు కూడా చౌకగా మారాయి. మిల్క్ బిస్కెట్లు, మేరీ బిస్కెట్లు, కొబ్బరి కుకీలు, చాక్లెట్ క్రీమ్ బిస్కెట్లు అన్నీ 50 పైసలు తగ్గి 3 రూపాయలకు చేరుకున్నాయి. పిల్లలు ఇష్టపడే ట్విస్టీ టేస్టీ నూడుల్స్, అట్టా నూడుల్స్ ధరలు కూడా తగ్గాయి. ఇప్పుడు ఇవి కూడా 1 రూపాయి వరకు తక్కువ ధరకు లభిస్తాయి.
పతంజలి దంత్ కాంతి టూత్‌పేస్ట్ ఇప్పుడు 14 రూపాయలు తక్కువకు లభించనుంది. గతంలో 120 రూపాయలుగా ఉన్న దీని ధర ఇప్పుడు 106 రూపాయలకు తగ్గించారు. అడ్వాన్స్‌డ్, ఓరల్ జెల్ వంటి ఇతర దంత్ కాంతి రకాలు కూడా తక్కువ ధరకే అందుబాటులో ఉన్నాయి. కేశ్ కాంతి షాంపూ, ఆమ్లా హెయిర్ ఆయిల్ కూడా తగ్గించబడ్డాయి. షాంపూ ధర 11 నుండి 14 రూపాయలు తగ్గింది, నూనె దాదాపు 6 రూపాయలు తగ్గింది.
ఆయుర్వేద ఉత్పత్తులపై..
పతంజలి ఆయుర్వేద, ఆరోగ్య ఉత్పత్తులైన ఆమ్లా జ్యూస్, గిలోయ్ జ్యూస్, కాకరకాయ-జామున్ జ్యూస్, బాదం పాక్ ధరలను కూడా తగ్గించారు. 1 కిలోల చ్యవన్‌ప్రాష్ ప్యాక్ ఇప్పుడు రూ.337లకే అందుబాటులో ఉంటుంది. నెయ్యి ధర కూడా గణనీయంగా తగ్గించారు. గతంలో రూ.780 ఖరీదు చేసే 900 మి.లీ ఆవు నెయ్యి ప్యాక్ ఇప్పుడు రూ.731కి అందుబాటులో ఉంటుంది. 450 మి.లీ ప్యాక్ కూడా సుమారు రూ.27లకు లభించనుంది. పతంజలి వేప, కలబంద సబ్బుల ధరలు కూడా 1 నుంచి 3 రూపాయల వరకు తగ్గించారు. గతంలో 25 రూపాయలు ఖరీదు చేసే సబ్బులు ఇప్పుడు 22 రూపాయలకు అందుబాటులో ఉన్నాయి. చిన్న ప్యాక్‌లు కూడా ఇప్పుడు కేవలం 9 రూపాయలకే అందుబాటులో ఉన్నాయి.
సరైన ధరకు మంచి ఉత్పత్తులు..
ప్రభుత్వం పన్నులను తగ్గించడంతో వాటి పూర్తి ప్రయోజనాన్ని తమ కస్టమర్లు పొందేలా చూసుకోవడానికి ఈ నిర్ణయం తీసుకున్నట్లు పతంజలి ఫుడ్స్ తెలిపింది. సరసమైన, స్వచ్ఛమైన ఉత్పత్తులను అందిస్తామనే తన వాగ్దానాన్ని కొనసాగిస్తామని కంపెనీ హామీ ఇచ్చింది.
మరిన్ని బిజినెస్‌ వార్తల కోసం ఇక్కడ క్లిక్‌ చేయండి
