Headlines

ఘోర రోడ్డు ప్రమాదాలు.. తల్లి, ఇద్దరు పిల్లలతో సహా ఒకే రోజు 11 మంది మృతి..!


తమిళనాడులో ఆదివారం (నవంబర్ 22) వరుస రోడ్డు ప్రమాదాలు తీవ్ర విషాదాన్ని నింపాయి. రెండు వేర్వేరు జిల్లాల్లో జరిగిన ప్రమాదాల్లో మొత్తం 11 మంది ప్రాణాలు కోల్పోయారు. తిరుచిరాపల్లి జిల్లాలో వేగంగా వెళ్తున్న కారు అదుపుతప్పి రోడ్డు పక్కన ఉన్న వేప చెట్టును ఢీకొట్టడంతో ఎనిమిది మంది మృతి చెందారు. మరో ఇద్దరు తీవ్రంగా గాయపడ్డారు. అటు తంజావూరు జిల్లాలో లారీ ఢీకొన్న ప్రమాదంలో తల్లి, ఆమె ఇద్దరు కుమారులు దుర్మరణం చెందారు. ఒకే రోజు జరిగిన ఈ రెండు ఘటనలు ఆయా కుటుంబాల్లో తీరని విషాదాన్ని మిగిల్చాయి.

చెట్టును ఢీకొన్న కారు.. ఎనిమిది మంది మృతి

తిరుచిరాపల్లి జిల్లాలోని ముసిరి సమీపంలో ఆదివారం (నవంబర్ 22) సాయంత్రం ఈ ఘోర ప్రమాదం జరిగింది. తంజావూరు జిల్లాలోని తిరుకట్టుపల్లికి చెందిన పది మంది నామక్కల్ జిల్లాలోని ఎరుమపట్టిలో జరిగిన చెవులు కుట్టించే వేడుకకు హాజరై తిరిగి వస్తున్నారు. సాయంత్రం సమయంలో జంబునాథపురం పోలీస్ స్టేషన్ పరిధిలోని కొత్తూరుపట్టి నాలుగు రోడ్ల కూడలి సమీపంలో వారి మారుతి ఈకో వాహనం అదుపుతప్పి రోడ్డు పక్కన ఉన్న వేప చెట్టును బలంగా ఢీకొట్టింది. ఈ ప్రమాదంలో వాహనం తీవ్రంగా ధ్వంసమైంది.

ఈ ఘటనలో ఐదుగురు అక్కడికక్కడే ప్రాణాలు కోల్పోయారు. తీవ్రంగా గాయపడిన మరో ఐదుగురిని ముసిరి ప్రభుత్వ ఆసుపత్రికి తరలించారు. వారిలో ముగ్గురు చికిత్స పొందుతూ మరణించడంతో మృతుల సంఖ్య ఎనిమిదికి చేరింది. మరో ఇద్దరు ఆసుపత్రిలో చికిత్స పొందుతున్నారు. మృతులను మణికం, సంగిలి, మురుగన్, రాజేష్, శక్తివేల్, సుబ్రమణి, పావడై, సీతారామన్‌గా గుర్తించారు. ప్రాథమిక విచారణలో అతివేగం కారణంగా డ్రైవర్ వాహనంపై నియంత్రణ కోల్పోయినట్లు పోలీసులు భావిస్తున్నారు. ఈ ఘటనపై కేసు నమోదు చేసి దర్యాప్తు చేపట్టారు.

మరో ఘటనలో తల్లి, ఇద్దరు కుమారులు మృతి!

మరోవైపు తంజావూరు జిల్లాలో జరిగిన మరో ప్రమాదం కూడా తీవ్ర విషాదాన్ని మిగిల్చింది. బెనజీర్ బేగం (29) తన ముగ్గురు కుమారులతో కలిసి బంధువుల ఇంటికి స్కూటర్‌పై వెళ్తున్నారు. ఈ క్రమంలో తిరువయ్యారు-తంజావూరు రహదారిపై అమ్మన్‌పేట గ్రామంలోని వినాయకుడి ఆలయం సమీపంలో ఎదురుగా వచ్చిన లారీ వారి స్కూటర్‌ను ఢీకొట్టింది. ఈ ప్రమాదంలో బెనజీర్ బేగం, ఆమె కుమారులు మహమ్మద్ జాహిద్ (11), మహమ్మద్ హాలిత్ (4) మరణించారు. మరో కుమారుడు మహమ్మద్ జావీద్ (12) తీవ్రంగా గాయపడగా, ఆసుపత్రికి తరలించి చికిత్స అందిస్తున్నారు. ప్రమాదం తర్వాత అక్కడి నుంచి వెళ్లిపోయిన లారీ డ్రైవర్‌ను పోలీసులు అరెస్టు చేశారు.

మృతుల కుటుంబాలకు రూ.2 లక్షల పరిహారం

తిరుచిరాపల్లి ప్రమాదంపై ప్రధాని నరేంద్ర మోదీ తీవ్ర దిగ్భ్రాంతి వ్యక్తం చేశారు. మృతుల కుటుంబాలకు ప్రగాఢ సానుభూతి తెలియజేస్తూ, క్షతగాత్రులు త్వరగా కోలుకోవాలని ఆకాంక్షించారు. ప్రధానమంత్రి జాతీయ సహాయ నిధి (PMNRF) నుంచి మృతుల కుటుంబాలకు ఒక్కొక్కరికి రూ.2 లక్షలు, గాయపడిన వారికి ఒక్కొక్కరికి రూ.50 వేల చొప్పున ఎక్స్‌గ్రేషియా ప్రకటించారు.

అటు తమిళనాడు ముఖ్యమంత్రి సి. జోసెఫ్ విజయ్ కూడా తిరుచిరాపల్లి ప్రమాదంపై విచారం వ్యక్తం చేశారు. గాయపడిన ఇద్దరికీ మెరుగైన వైద్యం అందించాలని అధికారులను ఆదేశించారు. వరుస ప్రమాదాలతో ఒకే రోజు 11 మంది ప్రాణాలు కోల్పోవడం తీవ్ర విషాదాన్ని నింపింది.

మరిన్ని క్రైమ్ వార్తల కోసం ఇక్కడ క్లిక్ చేయండి..



Source link

Leave a Reply

Your email address will not be published. Required fields are marked *