Bhagavad Gita Telugu: భగవద్గీతలోని 4వ అధ్యాయం, 10వ శ్లోకంలో శ్రీకృష్ణుడు మనిషి తనలోని ప్రాపంచిక భావోద్వేగాల నుంచి బయటపడి, దైవిక భావనలను ఎలా అలవర్చుకోవాలో వివరించారు. మనిషి ఆధ్యాత్మికంగా ఎదగడానికి ప్రధానంగా మూడు అడ్డంకులు ఉంటాయని ఈ శ్లోకం ద్వారా అర్థమవుతుంది. అవే రాగం (వ్యామోహం లేదా మమకారం), భయం, క్రోధం (కోపం). సాధారణంగా మనిషి జీవితంలో ఏదో ఒకదానిపై ఆశలు, కోరికలు కలిగి ఉంటాడు. మంచి ఉద్యోగం రావాలని, ఎక్కువ డబ్బు సంపాదించాలని, ఆరోగ్యంగా ఉండాలని కోరుకుంటాడు. అనుకున్నది జరగనప్పుడు నిరాశ, అసంతృప్తి కలుగుతాయి. అదే పరిస్థితులు తమకు అనుకూలంగా లేకపోతే భయం, ఆందోళన మొదలవుతాయి. ఇతరులు తమను బాధపెట్టినా, అనుకున్న విధంగా పనులు జరగకపోయినా కోపం వస్తుంది. ఇలా కోరికలు, భయాలు, కోపాలు మనసును నిరంతరం కలవరపెడుతుంటాయి.