మన వంటకాల్లో ముఖ్యంగా తెలుగు రాష్ట్రాల వంటకాల్లో గుత్తి వంకాయ కూరకు ఒక ప్రత్యేక స్థానం ఉంది. ఈ సాంప్రదాయ గుత్తి వంకాయ కూరకు కొత్త రుచిని జోడిస్తూ, పచ్చి కారంతో తయారు చేసే అద్భుతమైన రెసిపీని ఎలా చేయాలో ఇక్కడ తెలుసుకుందాం.. ఇది అన్నం, చపాతీ, బగారా రైస్, పులావ్, బిర్యానీ వంటి వాటితో అద్భుతంగా జతకడుతుంది. ఎప్పుడు చేసే గుత్తి వంకాయ కూర కాకుండా, పచ్చి మిరపకాయలను ఉపయోగించి తయారుచేసే ఈ మసాలా వల్ల కూరకు ఒక అసాధారణమైన రుచి వస్తుంది. అతిథులను ఆకట్టుకోవడానికి లేదా ప్రత్యేక సందర్భాలలో వండటానికి ఈ కూర సరైన ఎంపిక..
కావలసిన పదార్థాలు.. వంకాయలు: 250 గ్రాములు (తెల్ల వంకాయలు లేదా నల్ల వంకాయలు), నూనె: తగినంత, ఆవాలు, జీలకర్ర: అర టీస్పూన్ చొప్పున, పచ్చిమిర్చి (పోపు కోసం): 2 (పొడవుగా కట్ చేసినవి), కరివేపాకు: కొద్దిగా, ఉల్లిపాయ: 1 (తరిగినది), కొత్తిమీర: కొద్దిగా (అలంకరణకు), చింతపండు రసం: అర కప్పు (చిన్న నిమ్మకాయ సైజు చింతపండు నుండి – ఐచ్ఛికం), పచ్చిమిర్చి (కారం కోసం): 10-12 (మీ రుచికి తగ్గట్టు), వెల్లుల్లిపాయలు: 10-15 రెబ్బలు (పొట్టు తీసినవి), అల్లం: 1 అంగుళం ముక్క, పల్లీలు: 3-4 టేబుల్ స్పూన్లు, నువ్వులు: 2 టేబుల్ స్పూన్లు, ధనియాల పొడి: 1.5-2 టీస్పూన్లు, పసుపు: పావు టీస్పూన్, ఉప్పు: రుచికి సరిపడా, దాల్చిన చెక్క: చిన్న ముక్క (ఐచ్ఛికం), యాలకులు: 2 (ఐచ్ఛికం), లవంగాలు: 3-4 (ఐచ్ఛికం), కొత్తిమీర ఆకు: పిడిగెడంత (కాడలతో సహా) చొప్పున తీసుకోవాలి.
Updated on: Sep 27, 2026 | 8:18 PM
Share
-
- కావలసిన పదార్థాలు.. వంకాయలు: 250 గ్రాములు (తెల్ల వంకాయలు లేదా నల్ల వంకాయలు), నూనె: తగినంత, ఆవాలు, జీలకర్ర: అర టీస్పూన్ చొప్పున, పచ్చిమిర్చి (పోపు కోసం): 2 (పొడవుగా కట్ చేసినవి), కరివేపాకు: కొద్దిగా, ఉల్లిపాయ: 1 (తరిగినది), కొత్తిమీర: కొద్దిగా (అలంకరణకు), చింతపండు రసం: అర కప్పు (చిన్న నిమ్మకాయ సైజు చింతపండు నుండి – ఐచ్ఛికం), పచ్చిమిర్చి (కారం కోసం): 10-12 (మీ రుచికి తగ్గట్టు), వెల్లుల్లిపాయలు: 10-15 రెబ్బలు (పొట్టు తీసినవి), అల్లం: 1 అంగుళం ముక్క, పల్లీలు: 3-4 టేబుల్ స్పూన్లు, నువ్వులు: 2 టేబుల్ స్పూన్లు, ధనియాల పొడి: 1.5-2 టీస్పూన్లు, పసుపు: పావు టీస్పూన్, ఉప్పు: రుచికి సరిపడా, దాల్చిన చెక్క: చిన్న ముక్క (ఐచ్ఛికం), యాలకులు: 2 (ఐచ్ఛికం), లవంగాలు: 3-4 (ఐచ్ఛికం), కొత్తిమీర ఆకు: పిడిగెడంత (కాడలతో సహా) చొప్పున తీసుకోవాలి.
-
- ముందుగా స్టవ్ వెలిగించి ఒక పాన్లో ఒక టేబుల్ స్పూన్ నూనె వేసి వేడి చేయండి. నూనె వేడయ్యాక కట్ చేసిన 10-12 పచ్చిమిరపకాయలు, పొట్టు తీసిన 10-15 వెల్లుల్లి రెబ్బలు, ఒక అంగుళం అల్లం ముక్క వేసి ఫ్రై చేయండి. పచ్చిమిరపకాయలు చక్కగా ఫ్రై అయ్యి కొంచెం తెల్లబడిన తర్వాత వీటిని ఒక ప్లేట్లోకి తీసుకుని పక్కన ఉంచండి. అదే పాన్లో మరో మూడు, నాలుగు టేబుల్ స్పూన్ల పల్లీలు వేసి మీడియం మంటపై మూడు, నాలుగు నిమిషాలు కలుపుతూ వేయించండి. పల్లీలు చక్కగా వేగిన తర్వాత రెండు టేబుల్ స్పూన్ల నువ్వులు వేసి ఒకటి, రెండు నిమిషాలు వేయించండి. ఎండు కొబ్బరి ఇష్టపడేవారు ఒకటి, రెండు టేబుల్ స్పూన్ల ఎండు కొబ్బరిని కూడా చేర్చుకోవచ్చు. వీటిని కూడా ప్లేట్లోకి తీసుకుని చల్లారనివ్వండి.
-
- వేయించిన పదార్థాలు చల్లారిన తర్వాత వాటిని మిక్సీ గిన్నెలోకి తీసుకోండి. చిన్న దాల్చిన చెక్క ముక్క, రెండు యాలకులు, మూడు, నాలుగు లవంగాలు (లేదా అర టీస్పూన్ గరం మసాలా పొడి) మరియు పిడిగెడంత కొత్తిమీర ఆకులను కాడలతో సహా వేయండి. కొద్ది కొద్దిగా నీళ్లు కలుపుతూ మెత్తటి పేస్ట్లా గ్రైండ్ చేయండి. ఈ మసాలా పేస్ట్ను ఒక గిన్నెలోకి తీసుకుని, అందులో ఒకటిన్నర నుండి రెండు టీస్పూన్ల ధనియాల పొడి, పావు టీస్పూన్ పసుపు, రుచికి సరిపడా ఉప్పు వేసి బాగా కలపండి. ఇది వంకాయల్లో నింపే మసాలా ముద్ద.
-
- పావుకిలో వంకాయలను శుభ్రంగా కడిగి, తొడిమెను కొద్దిగా కట్ చేసి, వంకాయ చివరి వరకు కట్ అవ్వకుండా ముప్పావు వంతు కట్ చేయండి. ఇలా కట్ చేసిన వంకాయల్లో తయారుచేసుకున్న మసాలా ముద్దను నింపండి. వంకాయలను కట్ చేసిన వెంటనే మసాలా నింపితే ఉప్పు నీటిలో వేయాల్సిన అవసరం లేదు. అన్ని వంకాయలను ఇలాగే నింపి పక్కన ఉంచండి. మిగిలిన సగం కంటే ఎక్కువ మసాలా పేస్ట్ను గ్రేవీ కోసం పక్కన పెట్టండి. మళ్లీ స్టవ్ ఆన్ చేసి కడాయిలో మూడు, నాలుగు టేబుల్ స్పూన్ల నూనె వేసి వేడి చేయండి. నూనె వేడయ్యాక అర టీస్పూన్ ఆవాలు, అర టీస్పూన్ జీలకర్ర వేసి దోరగా వేయించండి.
-
- ఇందులోకి రెండు పొడవుగా కట్ చేసిన పచ్చిమిర్చి ముక్కలు, కొంచెం కరివేపాకు, తరిగిన ఒక ఉల్లిపాయ వేసి ఉల్లిపాయలు కొంచెం దోరగా వేగే వరకు ఫ్రై చేయండి. తర్వాత, స్టఫ్ చేసి పెట్టుకున్న వంకాయలను వేసి, నూనెలో కలుపుతూ మూడు, నాలుగు నిమిషాలు ఫ్రై చేయండి. మధ్యమధ్యలో మూతపెట్టి, తీస్తూ వంకాయలు మెత్తబడే వరకు మగ్గనివ్వండి. వంకాయలు కొంచెం మెత్తబడిన తర్వాత, పక్కన పెట్టిన మిగిలిన మసాలా ముద్దను వేసి మరో రెండు నిమిషాలు ఫ్రై చేయండి.
-
- ఇప్పుడు గ్రేవీకి సరిపడా ఒకటి నుండి ఒకటిన్నర కప్పు నీళ్లు పోసి కలపండి. మూతపెట్టి మీడియం మంటపై మూడు, నాలుగు నిమిషాలు ఉడికించండి. గ్రేవీ ఉడుకుతున్నప్పుడు, అర కప్పు చింతపండు రసం (మీకు పులుపు వద్దు అనుకుంటే ఈ దశను వదిలేయవచ్చు) వేసి బాగా కలపండి. మీడియం మంటపై ఆరేడు నిమిషాలు వంకాయలు పూర్తిగా మెత్తబడి, నూనె పైకి తేలే వరకు ఉడికించండి. చివరగా, కొంచెం కొత్తిమీర ఆకును వేసి బాగా కలిపి స్టవ్ ఆఫ్ చేయండి. పచ్చి కారంతో చేసిన ఈ గుత్తి వంకాయ కూర ఎంతో రుచికరంగా ఉంటుంది. దీన్ని వేడి వేడి అన్నంతో, చపాతీతో లేదా బిర్యానీతో ఆస్వాదించవచ్చు.