ఈ చిన్న పని చేస్తే చామంతి మొక్కకు గుత్తులు గుత్తులుగా పువ్వులు. ఎవ్వరూ చెప్పని ట్రిక్స్ ఇవే..

ఇంటి బాల్కనీలు, పెరట్లను రంగురంగుల పూల మొక్కలతో అలంకరించుకోవడం నేటి రోజుల్లో చాలామందికి ఒక అద్భుత అలవాటుగా మారింది. గులాబీ, మందార, బంతి వంటి పూలతో పాటు.. చలికాలం వస్తుందంటే అందరి దృష్టి చామంతి మొక్కలపైనే పడుతుంది. చలిగాలుల్లో రకరకాల రంగుల్లో విరబూసే చామంతి పువ్వులు ఇంటికి సరికొత్త అందాన్ని తెచ్చిపెడతాయి. అయితే ‘‘మేము చామంతి మొక్కలు నాటినా అవి సరిగ్గా ఎదగడం లేదు.. ఆశించిన స్థాయిలో పూలు పూయడం లేదు.. మొక్క బక్కచిక్కినట్లు పొడవుగా పెరుగుతోంది’’ అని చాలామంది గార్డెనింగ్ ప్రియులు బాధపడుతుంటారు. ఈ సమస్యలకు చెక్ పెట్టి, మీ చామంతి మొక్క గుబురుగా పెరిగి, గుత్తులు గుత్తులుగా పూలు పూయాలంటే అనుసరించాల్సిన ముఖ్యమైన చిట్కాల గురించి తెలుసుకోవడం ముఖ్యం.

మొక్క గుబురుగా పెరగాలంటే పించింగ్ తప్పనిసరి

చామంతి మొక్క పొడవుగా మాత్రమే పెరిగిపోతుంటే దానికి పూలు తక్కువగా వస్తాయి. మొక్క బాగా విస్తరించి కొమ్మలతో దట్టంగా మారాలంటే పించింగ్ అనే ప్రక్రియను క్రమం తప్పకుండా చేయాలి.

ఎలా చేయాలి?: మొక్క లేత కొమ్మల పైభాగాలను వేళ్లతో సున్నితంగా తుంచాలి. ఇలా చేయడం వల్ల పైకి పెరిగే ఎదుగుదల ఆగి, కింది ఆకుల కణుపుల నుంచి లెక్కలేనన్ని కొత్త కొమ్మలు పుట్టుకొస్తాయి.

ఎప్పుడు చేయాలి?: మొక్క ఎదుగుదల దశలో ఉన్నప్పుడు ప్రతి 10 నుంచి 15 రోజులకు ఒకసారి కొనలను తుంచుతుండాలి.

ముఖ్య గమనిక: మొక్కకు మొగ్గలు వచ్చే వరకు మాత్రమే ఈ ప్రక్రియ చేయాలి. సాధారణంగా నవంబర్ నెలాఖరు నాటికి మొగ్గలు ఏర్పడతాయి. ఒక్కసారి మొగ్గలు రావడం మొదలయ్యాక చివర్లను తుంచకూడదు; అలా చేస్తే పూలు పూయడం ఆలస్యమవ్వడమే కాకుండా పూల సంఖ్య కూడా తగ్గుతుంది.

సేంద్రియ ఎరువులతో పోషకాల బలం

చామంతి మొక్క బలంగా, పచ్చగా ఉండటానికి రసాయన ఎరువుల కంటే సహజ సిద్ధమైన సేంద్రియ ఎరువులు మేలు చేస్తాయి.

మొక్క నాటిన 35 నుంచి 40 రోజుల తర్వాత బలమైన పోషకాలు అందించాలి.

ఎరువు తయారీ: బాగా చివికిన ఆవు పేడ బూడిదను, వర్మీకంపోస్ట్‌ను సమపాళ్లలో కలపాలి.

కుండీలోని పైమట్టిని గునపం లేదా చిన్న కర్రతో సున్నితంగా దున్ని, ఈ మిశ్రమాన్ని వేర్ల దగ్గర వేసి పైనుంచి తేలికగా నీరు పోయాలి.

ఈ సహజ ఎరువుల్లోని నత్రజని తదితర పోషకాలు మొక్క వేర్లను బలోపేతం చేసి, ఆకులు ముదురు ఆకుపచ్చగా, కొమ్మలు బలిష్టంగా మారేలా చేస్తాయి.

పిండి పురుగుల నుంచి రక్షణ

చామంతి మొక్కలను ప్రధానంగా వేధించే సమస్య మీలీబగ్స్. ఇవి కాండం, ఆకుల అడుగున చేరి రసాన్ని పీల్చేసి మొక్కను నిర్వీర్యం చేస్తాయి. వీటి నివారణకు రసాయనాలు వాడకుండా ఇంట్లోనే పరిష్కారం పొందవచ్చు. లీటర్ నీటిలో కొద్దిగా వేప నూనెను కలిపి మొక్క మొత్తం తడిసేలా పిచికారీ చేయాలి. ప్రత్యామ్నాయంగా, కొద్దిగా లిక్విడ్ సోప్‌ను నీటిలో కలిపి క్రమం తప్పకుండా పిచికారీ చేయడం వల్ల పిండి పురుగులు రాలిపోయి మొక్క సంపూర్ణ ఆరోగ్యంతో ఎదుగుతుంది.

నాటేటప్పుడు తీసుకోవాల్సిన జాగ్రత్తలు

విత్తనాలు లేదా కొమ్మల ద్వారా పెంచిన మొక్క 5 నుంచి 6 అంగుళాల ఎత్తుకు చేరుకున్నప్పుడు దానిని వెడల్పాటి పెద్ద కుండీలోకి మార్చుకోవాలి. మార్చే ముందు వేర్లు దెబ్బతినకుండా ఉండేందుకు నర్సరీ బ్యాగుల్లో లేదా పాత కుండీలో కాస్త నీరు పోసి సున్నితంగా తీయాలి. నాటిన 15 రోజుల తర్వాత పాడైపోయిన లేదా పసుపు పచ్చగా మారిన ఆకులను ఎప్పటికప్పుడు తొలగిస్తూ ఉంటే, మొక్క ఆరోగ్యంగా పెరిగి చలికాలంలో పూల తోటను తలపించేలా విరబూస్తుంది.