నేటి డిజిటల్ యుగంలో ఆర్టిఫిషియల్ ఇంటెలిజెన్స్ ప్రపంచాన్ని శాసిస్తోంది. టికెట్ బుకింగ్ నుంచి ప్రశ్నలకు సమాధానాలు రాబట్టడం వరకు సాంకేతికతతో పనులు సులువైపోయాయి. ప్రస్తుత తరానికి ఏఐ అనేది దైనందిన జీవితంలో ఒక సాధారణ విషయంగా మారినప్పటికీ, పాత తరం వారికి మాత్రం ఇది ఇంకా వింతగానే అనిపిస్తుంది. ఈ క్రమంలో ఏఐ చాట్బాట్ అయిన చాట్జీపీటీని నిజమైన మనిషి అనుకుని అమాయకంగా మాట్లాడిన ఓ బామ్మ వీడియో ప్రస్తుతం సోషల్ మీడియాలో నెటిజన్ల మనసులను దోచుకుంటోంది. సోషల్ మీడియాలో వైరల్ అవుతున్న వీడియో ప్రకారం.. ఆషు అనే యువతి తన బామ్మతో సరదాగా ఒక ప్రాంక్ చేయాలని భావించింది. ఫోన్లో చాట్జీపీటీ యాప్ వాయిస్ మోడ్ను ఆన్ చేసి, బామ్మ వద్దకు వెళ్లి విదేశాల నుంచి నా ఫ్రెండ్ మాట్లాడటానికి కాల్ చేసింది.. ఆమెకు హిందీ కూడా వచ్చు, ఒకసారి మాట్లాడు అంటూ ఫోన్ను బామ్మ చేతికి ఇచ్చింది.
ఆప్యాయంగా ముచ్చట్లు..
మనవరాలి మాటలను పూర్తిగా నమ్మేసిన ఆ బామ్మ, ఫోన్ అవతలి వైపు ఉన్నది ఏఐ చాట్బాట్ అని గ్రహించలేకపోయింది. నిజంగానే మనవరాలి స్నేహితురాలే మాట్లాడుతుందని భావించి చాలా ఆప్యాయంగా హిందీలో ముచ్చట్లు మొదలుపెట్టింది. అవతలి నుంచి చాట్జీపీటీ హిందీలో స్పందిస్తూ బదులిస్తుండటంతో.. బామ్మ మరింత ఆసక్తిగా ఎంతో అమాయకంగా ప్రశ్నలు అడుగుతూ సంభాషణను కొనసాగించింది.
నెటిజన్ల మనసులు గెలుచుకున్న బామ్మ అమాయకత్వం
బామ్మ ఎంతో సహజంగా, ఆప్యాయంగా చాట్జీపీటీతో మాట్లాడుతున్న దృశ్యాలను మనవరాలు తన కెమెరాలో బంధించి సోషల్ మీడియా వేదికగా పంచుకుంది. ఈ వీడియో పోస్ట్ చేసిన కొద్దిసేపట్లోనే లక్షలాది వ్యూస్తో విపరీతంగా వైరల్ అయ్యింది. ఈ వీడియో చూసిన నెటిజన్లు రకరకాలుగా స్పందిస్తూ కామెంట్లు పెడుతున్నారు. “పాత తరం వ్యక్తుల అమాయకత్వం ఎంత స్వచ్ఛంగా ఉంటుందో ఈ వీడియో చూస్తే తెలుస్తోంది’’ ‘‘సాంకేతికత ఎంత ఎదిగినా.. మన పెద్దల ముద్దు ముద్దు మాటలు, ఆప్యాయతలు ఎప్పటికీ ప్రత్యేకమే’’ అంటూ నెటిజన్లు ఆ బామ్మ ముచ్చట్లకు ఫిదా అవుతున్నారు. ప్రస్తుతం ఈ క్యూట్ వీడియో ఇంటర్నెట్లో తెగ చక్కర్లు కొడుతోంది.