టూ-స్టెప్ వెరిఫికేషన్, పాస్కీస్, లింక్డ్ డివైజెస్ను ఎప్పటికప్పుడు చెక్ చేసుకోవడం ద్వారా మీ వాట్సాప్ ఖాతాకు పటిష్టమైన భద్రతను అందించవచ్చు. ఓటీపీలను ఎవరితోనూ పంచుకోకుండా, అనుమానాస్పద లింక్లను క్లిక్ చేయకుండా ఉండటం చాలా ముఖ్యం. స్కామర్ల మోసాల బారిన పడకుండా వాట్సాప్ను సురక్షితంగా ఉంచుకునే పద్ధతులను తెలుసుకుందాం!
టూ-స్టెప్ వెరిఫికేషన్
వాట్సాప్ ఖాతాకు పూర్తి స్థాయిలో భద్రతను చేకూర్చడంలో టూ-స్టెప్ వెరిఫికేషన్ కీలక పాత్ర పోషిస్తుంది. ఈ ఫీచర్ను ఉపయోగించి మీ నెంబర్ కోసం ప్రత్యేకంగా 6 డిజిట్ల పిన్ నెంబర్ను సెట్ చేసుకోవాల్సి ఉంటుంది. ఒకవేళ ఎవరైనా మీ మొబైల్ నెంబర్తో వాట్సాప్ క్రియేట్ చేయాలని ప్రయత్నిస్తే ఈ పిన్ తప్పనిసరిగా ఎంటర్ చేయాల్సి వస్తుంది. తద్వారా మీ వాట్సాప్ డేటా మరియు అకౌంట్ ఎవరి చేతికి వెళ్లకుండా పటిష్టంగా అడ్డుకోవచ్చు. ఈ పిన్ క్రియేట్ చేయడానికి వాట్సాప్ సెట్టింగ్స్లోకి వెళ్లి, ‘అకౌంట్’ ఆప్షన్ ద్వారా టూ-స్టెప్ వెరిఫికేషన్ను ఎనేబుల్ చేసుకొని పిన్ నెంబర్ ఇస్తే సరిపోతుంది.
పాస్కీస్, ఫేస్ లాక్
సాధారణ పాస్వర్డ్లు, ఓటీపీల కంటే ‘పాస్కీస్’ వ్యవస్థ అత్యంత సురక్షితమైనదిగా నిపుణులు చెబుతున్నారు. దీని ద్వారా మీ ఫోన్ ఫేస్ లాక్, ఫింగర్ప్రింట్ లేదా స్క్రీన్ లాక్ పిన్ను ఉపయోగించి నేరుగా వాట్సాప్లోకి లాగిన్ అవ్వవచ్చు. దీనివల్ల ఓటీపీల ఆధారిత స్కామ్ల నుండి మీ అకౌంట్ను సులభంగా రక్షించుకోవచ్చు. దీనిని సెట్టింగ్స్ > అకౌంట్ > పాస్కీస్ ఆప్షన్లోకి వెళ్లి సులభంగా సెటప్ చేసుకోవచ్చు.
లింక్డ్ డివైజెస్ పరిశీలన
కొన్నిసార్లు మన ప్రమేయం లేకుండానే మన వాట్సాప్ అకౌంట్ వేరే కంప్యూటర్ లేదా వెబ్ బ్రౌజర్లో ఓపెన్ అయి ఉండే అవకాశం ఉంది. కాబట్టి దీనిని ఎప్పటికప్పుడు తనిఖీ చేస్తూ ఉండాలి. ఇందుకోసం వాట్సాప్లో కుడివైపు పైభాగంలో ఉన్న మూడు చుక్కలపై క్లిక్ చేసి ‘Linked Devices’ ఆప్షన్లోకి వెళ్లాలి. అక్కడ మీకు పరిచయం లేని లేదా తెలియని డివైజ్ ఏదైనా కనిపిస్తే వెంటనే దానిపై క్లిక్ చేసి ‘లాగౌట్’ (Logout) చేయాలి.
అనుమానాస్పద లింక్స్
ఎంతటి ఆధునిక సెక్యూరిటీ ఉన్నప్పటికీ, చిన్న పొరపాటు వల్ల అకౌంట్ హ్యాక్ అయ్యే ప్రమాదం ఉంది. కాబట్టి వాట్సాప్కు వచ్చే ఆరు అంకెల ఓటీపీ (SMS Code) ని ఎవరితోనూ, ఏ పరిస్థితిలోనూ పంచుకోవద్దు. అలాగే ‘రూ.10 లక్షల లాటరీ వచ్చింది’, ‘ఉచిత రీఛార్జ్’ అంటూ సైబర్ క్రిమినల్స్ పంపే నకిలీ మెసేజ్ లింక్లను ఎట్టి పరిస్థితుల్లోనూ క్లిక్ చేయవద్దని హెచ్చరిస్తున్నారు. పైన పేర్కొన్న భద్రతా చిట్కాలను క్రమం తప్పకుండా పాటించడం ద్వారా సైబర్ నేరగాళ్ల మోసాలకు పూర్తిస్థాయిలో చెక్ పెట్టవచ్చు. మీ వాట్సాప్ ఖాతాను సురక్షితంగా ఉంచుకోవడానికి ఈ సెట్టింగ్స్ను ఇప్పుడే మార్చుకోవడం ఎంతో ఉత్తమం.
