ఈ కేసు 2022లోది.. కానీ లీగల్ బ్యాటిల్లో గెలవడానికి నాలుగేళ్లు పట్టింది. ఈ ఏడాది జనవరిలో కథ సుఖాంతమైంది. మరి అదేంటంటే.. స్టాక్ మార్కెట్లో ట్రేడింగ్ చేసే ప్రతి ఒక్కరికీ ఒక కల ఉంటుంది.. “ఒక్కసారి పెద్ద మొత్తంలో క్యాపిటల్ చేతికి వస్తే బాగుండు” అని. 2018లో మహారాష్ట్రకు చెందిన రాజ్ గురు అనే సామాన్య ట్రేడర్ విషయంలో ఆ కల నిజమైంది. కాకపోతే అది అతనికి అదృష్టమో లేక విధి ఆడిన వింత నాటకమో అర్థం కావడానికి అతనికి కొంచెం సమయం పట్టింది.
ఒకరోజు ఉదయం రాజ్ గురు తన కోటక్ సెక్యూరిటీస్ అకౌంట్ ఓపెన్ చేయగానే, కళ్లు బైర్లు కమ్మే అంకె కనిపించింది. అకౌంట్లో ఏకంగా రూ. 40 కోట్ల మార్జిన్ ఉంది! అది సిస్టమ్ లోపమని అతనికి తెలుసు, కానీ ఆ అవకాశాన్ని వదులుకోవాలనుకోలేదు. వెంటనే బ్యాంక్ నిఫ్టీ ఆప్షన్స్లో భారీ లాట్ సైజుతో ట్రేడ్ మొదలుపెట్టాడు.
మొదటి ట్రేడ్లో రూ. 50 లక్షల లాస్! ఏ సామాన్యుడైనా సరే ఆ నష్టానికి వణికిపోయి ట్రేడింగ్ ఆపేస్తాడు. కానీ రాజ్ గురు డీలా పడలేదు. తన ట్రేడింగ్ నైపుణ్యాన్ని నమ్ముకుని రెండో ట్రేడ్ చేశాడు. ఫలితం? కేవలం 20 నిమిషాల్లో రూ. 2.25 కోట్ల ప్రాఫిట్! నెట్ ప్రాఫిట్ రూ. 1.75 కోట్లు.
లాభం రాగానే బ్రోకరేజ్ సంస్థ అలర్ట్ అయ్యి మార్జిన్ బ్లాక్ చేసింది. “ఆ ప్రాఫిట్ మాది, అది మా సిస్టమ్ తప్పిదం వల్ల వచ్చింది” అని కోటక్ వాదించింది. కానీ రాజ్ గురు వెనక్కి తగ్గలేదు. “సిస్టమ్ తప్పు మీది కావచ్చు, కానీ ట్రేడ్ చేసింది నేను, రిస్క్ తీసుకుంది నేను. నష్టం వస్తే మీరేం చేసేవారు?” అని ప్రశ్నించాడు. ఈ వివాదం బొంబాయి హైకోర్టుకు చేరింది.
కోర్టులో పబ్లిక్ ప్రాసిక్యూటర్ రాజ్ గురు తరపున అద్భుతంగా వాదించారు. ట్రేడింగ్ అనేది హ్యాకింగ్ కాదు, అది ఒక నైపుణ్యం అని స్పష్టం చేశారు. మార్కెట్లో 99 శాతం మంది నష్టపోతుంటే, తన టాలెంట్తో ప్రాఫిట్ సంపాదించిన రాజ్ గురుకు ఆ డబ్బు చెందాలని కోర్టు తీర్పునిచ్చింది. రూ. 1.75 కోట్లు అతనికి చెల్లించాలని కోటక్ సెక్యూరిటీస్ను ఆదేశించింది. ఇది కేవలం ఒక ట్రేడర్ విజయం మాత్రమే కాదు, వ్యవస్థలోని లోపాలను ప్రశ్నించిన ఒక సామాన్యుడి ధైర్యానికి నిదర్శనం అని బిజినెస్ నిపుణులు అన్నారు.
