అమెరికా అధ్యక్షుడు డొనాల్డ్ ట్రంప్, రష్యా అధ్యక్షుడు వ్లాదిమిర్ పుతిన్ మధ్య బుధవారం (ఏప్రిల్ 29, 2026) జరిగిన సుదీర్ఘ ఫోన్ సంభాషణ అంతర్జాతీయ రాజకీయాల్లో పెను సంచలనం సృష్టించింది. దాదాపు గంటన్నర పాటు సాగిన ఈ చర్చల్లో ఉక్రెయిన్ యుద్ధం ముగింపు, ఇరాన్ అణు సంక్షోభం ప్రధానాంశాలుగా నిలిచాయి.
ఈ సంభాషణలో అత్యంత కీలకమైన అంశం ఉక్రెయిన్ తాత్కాలిక కాల్పుల విరమణ. వచ్చే నెలలో జరగనున్న ‘విజయ దినోత్సవం’ (Victory Day) సందర్భంగా యుద్ధాన్ని తాత్కాలికంగా నిలిపివేయాలని పుతిన్ ప్రతిపాదించారు. ఈ ప్రతిపాదనను ట్రంప్ సానుకూలంగా స్వాగతించారు. ముందుగా ఉక్రెయిన్తో యుద్ధాన్ని ముగించడమే తమ ప్రాధాన్యత అని, ఆ తర్వాతే ఇతర సహకారాల గురించి చర్చించవచ్చని ట్రంప్ స్పష్టం చేశారు. పుతిన్ త్వరలోనే దీనిపై అధికారిక ప్రకటన చేసే అవకాశం ఉందని ఆయన ఆశాభావం వ్యక్తం చేశారు.
ఇరాన్ అణ్వాయుధాల అంశంపై ట్రంప్ తనదైన శైలిలో హెచ్చరికలు జారీ చేశారు. “ఇరాన్ను ఎప్పటికీ అణ్వాయుధ దేశంగా మారనివ్వం” అని ఆయన పునరుద్ఘాటించారు. ప్రస్తుతం ఇరాన్ వద్ద అతి తక్కువ సంఖ్యలో క్షిపణులు ఉన్నాయని, ఇప్పటికే వారి క్షిపణి తయారీ కేంద్రాల్లో 80 శాతాన్ని ధ్వంసం చేశామని ట్రంప్ పేర్కొన్నారు. ఒకవేళ ఇరాన్ త్వరగా ఒప్పందానికి రాకపోతే, మిగిలిన సామర్థ్యాన్ని కూడా వేగంగా తుడిచిపెడతామని ఆయన హెచ్చరించారు.
కాగా, ఈ చర్చలు అత్యంత వృత్తిపరంగా, స్నేహపూర్వక వాతావరణంలో జరిగాయని క్రెమ్లిన్ వర్గాలు తెలిపాయి. వాషింగ్టన్లో ట్రంప్పై జరిగిన దాడి ప్రయత్నాన్ని పుతిన్ ఖండించారు. ఇరాన్తో కాల్పుల విరమణ ఒప్పందాన్ని పొడిగించాలని ట్రంప్ తీసుకున్న నిర్ణయాన్ని రష్యా సమర్థించింది. ఈ చర్చలు ప్రపంచ శాంతికి బాటలు వేస్తాయా లేదా అనేది రాబోయే రోజుల్లో పుతిన్ చేసే ప్రకటనపై ఆధారపడి ఉంటుంది. రెండు అగ్రరాజ్యాల అధినేతలు పరస్పర సహకారంతో ముందుకు సాగాలని నిర్ణయించుకోవడం అంతర్జాతీయ దౌత్య విభాగంలో ఆసక్తికర పరిణామం.
#WATCH | On his conversation with Russian President Putin earlier today, US President Donald J Trump says, “… He told me he’d like to be involved with the (nuclear) enrichment (in Iran), if he can help us get it. I said I’d much rather have you be involved with ending the war… pic.twitter.com/ZaHPhLHBK9
— ANI (@ANI) April 29, 2026
మరిన్ని అంతర్జాతీయ వార్తల కోసం ఇక్కడ క్లిక్ చేయండి..
