ఆధునిక కాలంలో సౌకర్యం కోసం మనం నాన్-స్టిక్, అల్యూమినియం పాత్రలకు అలవాటు పడ్డాం. కానీ, మన పూర్వీకులు వాడిన ఇత్తడి, రాగి పాత్రల వెనుక బలమైన ఆరోగ్య రహస్యాలు ఉన్నాయి.వంటకు అల్యూమినియం పాత్రలు మంచివా లేక ఇత్తడి (Brass) పాత్రలు మంచివా అనే అంశంపై నిపుణులు వెల్లడించిన ఆసక్తికరమైన విషయాలు ఇప్పుడు తెలుసుకుందాం..
అల్యూమినియం పాత్రల ముప్పు: అల్యూమినియం త్వరగా వేడెక్కుతుంది. ధర కూడా తక్కువ. అందుకే హోటళ్లలో, ఇళ్లలో దీనిని ఎక్కువగా వాడతారు. కానీ, పరిశోధనల ప్రకారం, అల్యూమినియం పాత్రల్లో వండినప్పుడు ఆ లోహం కణాలు ఆహారంలోకి చేరుతాయి. మన శరీరం అల్యూమినియాన్ని విసర్జించడం కష్టం. ఇది మెదడు కణాలపై ప్రభావం చూపుతుంది. జీర్ణక్రియను దెబ్బతీస్తుంది. ముఖ్యంగా టమాటాలు లేదా నిమ్మరసం వంటి పుల్లని పదార్థాలు ఇందులో వండినప్పుడు లోహం మరింత వేగంగా కరిగి ఆహారంలో కలుస్తుంది.
ఇత్తడి పాత్రల ప్రయోజనాలు: ఇత్తడి అనేది రాగి (Copper), జింక్ (Zinc)ల మిశ్రమం. ఆయుర్వేదం ప్రకారం, ఇత్తడి పాత్రల్లో వండిన ఆహారం తీసుకోవడం వల్ల శరీరానికి మేలు జరుగుతుంది. అల్యూమినియంలో వండినప్పుడు ఆహారంలోని పోషకాలు నశిస్తాయి. కానీ, ఇత్తడిలో 90శాతం పోషకాలు పదిలంగా ఉంటాయి. ఇందులోని జింక్ రక్తాన్ని శుద్ధి చేయడానికి, చర్మ ఆరోగ్యాన్ని మెరుగుపరచడానికి తోడ్పడుతుంది. ఇత్తడి పాత్రల్లో వండిన ఆహారానికి ప్రత్యేకమైన రుచి, సువాసన వస్తాయి.
ఇవి కూడా చదవండి
తీసుకోవాల్సిన జాగ్రత్తలు: ఇత్తడి పాత్రలను వాడుతున్నప్పుడు కలై (Tin coating) చేయించడం ముఖ్యం. కలై లేని ఇత్తడి పాత్రల్లో పులుపు ఉన్న పదార్థాలను వండితే అవి లోహంతో చర్య జరిపి ఆహారాన్ని విషతుల్యం చేసే అవకాశం ఉంది. కేవలం పాలు కాచుకోవడానికి లేదా అన్నం వండుకోవడానికి కలై లేని పాత్రలను వాడవచ్చు. ఆరోగ్యకరమైన జీవనశైలి కోసం అల్యూమినియం వాడకాన్ని తగ్గించి, మళ్లీ సంప్రదాయ ఇత్తడి లేదా మట్టి పాత్రల వైపు మొగ్గు చూపడం ఉత్తమం. ఇది కేవలం వంట విధానం మాత్రమే కాదు, దీర్ఘకాలిక ఆరోగ్యానికి ఒక పెట్టుబడి.
మరిన్ని లైఫ్ స్టైల్ న్యూస్ కోసం క్లిక్ చేయండి..
