ఉద్యోగ జీవితంలో ఒడిదుడుకులు సహజం. అనుకోకుండా ఉద్యోగం కోల్పోయినప్పుడు లేదా కొంతకాలం విరామం తీసుకున్నప్పుడు, చాలా మందిని వేధించే ప్రధాన ప్రశ్న తమ EPFO ఖాతాలో జమ అయిన డబ్బు పరిస్థితి ఏమవుతుందన్నదే. ముఖ్యంగా కొత్తగా కాంట్రిబ్యూషన్లు ఆగిపోతే వడ్డీ కూడా ఆగిపోతుందా అనే సందేహం ఎక్కువగా ఉంటుంది.
అయితే నిబంధనల ప్రకారం ఉద్యోగం లేకపోయినా మీ పీఎఫ్ డబ్బుపై వడ్డీ ఆగదు. మీ ఖాతాలోకి కొత్తగా చెల్లింపులు రాకపోయినా, ఇప్పటికే ఉన్న మొత్తంపై వడ్డీ కొనసాగుతూనే ఉంటుంది. సాంకేతికంగా 36 నెలల పాటు కాంట్రిబ్యూషన్ లేకపోతే ఖాతాను ఇన్యాక్టివ్గా వర్గీకరించినప్పటికీ, వడ్డీ లెక్కింపు మాత్రం ఆగదు. అంటే మీరు ఉద్యోగ విరామంలో ఉన్నప్పటికీ మీ డబ్బు మీకోసం పనిచేస్తూనే ఉంటుంది.
పీఎఫ్ ఖాతా ప్రధానంగా కాంపౌండ్ ఇంట్రెస్ట్తో పెరుగుతుంది. 2025-26 ఆర్థిక సంవత్సరానికి సుమారు 8.25 శాతం వడ్డీ రేటు ఉండటం దీన్ని మరింత ఆకర్షణీయంగా చేస్తోంది. ఉదాహరణకు మీ ఖాతాలో రూ.5 లక్షలు ఉన్నట్లయితే, కొత్తగా డబ్బు జమ చేయకపోయినా కాలక్రమేణా ఈ మొత్తం గణనీయంగా పెరిగే అవకాశం ఉంది. అయితే నిరుద్యోగ సమయంలో వెంటనే పీఎఫ్ మొత్తాన్ని ఉపసంహరించుకోవడం తెలివైన నిర్ణయం కాకపోవచ్చు. అత్యవసర పరిస్థితుల్లో మాత్రమే ఉపసంహరణ చేయాలని నిపుణులు సూచిస్తున్నారు. మధ్యలో డబ్బు తీసుకోవడం వల్ల చక్రవడ్డీ ప్రయోజనం కోల్పోయే ప్రమాదం ఉంటుంది.
ఇక డిజిటల్ సౌకర్యాల వల్ల మీ పీఎఫ్ వివరాలను తెలుసుకోవడం చాలా సులభం అయింది. UMANG యాప్ లేదా EPFO అధికారిక వెబ్సైట్ ద్వారా మీరు మీ పాస్బుక్, బ్యాలెన్స్, వడ్డీ వివరాలను ఎప్పుడైనా చూసుకోవచ్చు. ముఖ్యంగా గుర్తుంచుకోవాల్సిన విషయం ఏమిటంటే 58 ఏళ్ల వయస్సు వరకు మీ పీఎఫ్పై వడ్డీ లభిస్తుంది.
ఆ తర్వాత వడ్డీ ఆగిపోతుంది. కాబట్టి ఆ దశలో మీ నిధులను సరైన పెట్టుబడులలోకి మార్చడం అవసరం. మొత్తానికి ఉద్యోగ విరామం మీ పీఎఫ్ వృద్ధిని ఆపదు. సరైన నిర్ణయాలతో అది మీ భవిష్యత్తుకు బలమైన ఆర్థిక భద్రతగా కొనసాగుతుంది.
