భారత్, అమెరికా వాణిజ్య సంబంధాలపై మరోసారి దృష్టి కేంద్రీకృతమైంది. ఈ నెల చివర్లో ఇరుదేశాలు ముఖాముఖి వాణిజ్య చర్చలను పునఃప్రారంభించనున్నట్లు వాణిజ్య వర్గాలు తెలిపాయి. ప్రధాన సంధానకర్త నేతృత్వంలోని భారత ప్రతినిధి బృందం ఏప్రిల్ 20 నుంచి అమెరికాలో పర్యటించనుంది. సుమారు మూడు నుంచి నాలుగు నెలల విరామం తర్వాత జరగనున్న తొలి ప్రత్యక్ష సమావేశం కావడం విశేషం. ఈ మధ్యకాలంలో ఇరుపక్షాలు వర్చువల్ విధానంలో చర్చలు కొనసాగించాయి.
ఫిబ్రవరి 7న విడుదలైన ఉమ్మడి ప్రకటనకు కొనసాగింపుగా ఈ చర్చలు సాగనున్నాయి. ముఖ్యంగా ఒక చట్టపరమైన వాణిజ్య ఒప్పందాన్ని ఖరారు చేయడంపై దృష్టి పెట్టే అవకాశముందని అధికారులు చెబుతున్నారు. అంతేకాక అమెరికా ప్రారంభించిన వివిధ వాణిజ్య దర్యాప్తులపై కూడా చర్చలు జరిగే అవకాశం ఉంది. భవిష్యత్తులో వాణిజ్య సమస్యలను ఎలా పరిష్కరించాలి, వాటికి సంబంధించి కార్యాచరణ ఎలా ఉండాలి అనే అంశాలపై ఇరుదేశాలు చర్చించనున్నాయి. ఈ ప్రక్రియను ముందుకు తీసుకెళ్లడానికి కాలపరిమితులు, తదుపరి చర్యలను ఉమ్మడిగా నిర్ణయించుకోవడమే ప్రధాన లక్ష్యంగా కనిపిస్తోంది.
ఇదే సమయంలో అంతర్జాతీయ ఇంధన మార్కెట్పై కూడా కీలక వ్యాఖ్యలు వెలువడ్డాయి. అమెరికా మాజీ అధ్యక్షుడు డొనాల్డ్ ట్రంప్, ఇరాన్ వివాదం ముగిసిన తర్వాత చమురు ధరలు భారీగా పడిపోవచ్చని అంచనా వేశారు. ఓ న్యూస్ ఛానెల్కు ఇచ్చిన ఇంటర్వ్యూలో ఆయన మాట్లాడుతూ.. ప్రస్తుతం బ్యారెల్కు సుమారు 92 డాలర్ల వద్ద ఉన్న ధరలు యుద్ధం ముగిసిన తర్వాత గణనీయంగా తగ్గే అవకాశం ఉందన్నారు. అమెరికాలో ప్రస్తుతం గ్యాలన్కు 4 డాలర్లకు పైగా ఉన్న ఇంధన ధరలు కూడా ఎన్నికల సమయానికి గణనీయంగా తగ్గవచ్చని ఆయన విశ్వాసం వ్యక్తం చేశారు. ఈ పరిణామాల నేపథ్యంలో ప్రపంచ చమురు మార్కెట్లు, అలాగే వాణిజ్య చర్చలపై పెట్టుబడిదారులు దృష్టి సారిస్తున్నారు.
మరిన్ని బిజినెస్ వార్తల కోసం ఇక్కడ క్లిక్ చేయండి
