మెగాస్టార్ చిరంజీవి గాడ్ ఫాదర్ ప్రాజెక్ట్పై చర్చించడానికి వెళ్లిన డైరెక్టర్ బాబీ, ఆ సినిమా కథను తాను తెరకెక్కించలేనని స్పష్టం చేసిన సంఘటనను ఇటీవల ఓ ఇంటర్వ్యూలో వివరించారు. చిరంజీవి 4 గంటలకు రావాలని చెప్పగా, బాబీ 3:45కే చేరుకున్నారు. భోజనం తర్వాత చిరంజీవి బాబీని చూసి ఏదో ఇబ్బంది పడుతున్నాడని గ్రహించారట. చాలాసేపు సినిమా విషయాలు మినహా అన్ని మాట్లాడిన తర్వాత, చిరంజీవి నేరుగా లూసిఫర్ చూశావా? అని బాబీని అడిగారట. బాబీ చూశానని, అయితే అది తనకు ఓన్ అవ్వలేదని, ఇంకొకరి కథను తాను మార్చలేనని తెలిపారట. చిన్నతనం నుండి తాను చూసిన చిరంజీవి అంటే బీడీ, ఘరానా మొగుడు, గ్యాంగ్ లీడర్, స్వాగ్, ఎంటర్టైన్మెంట్ అని, అలాంటి చిరంజీవి ఆ కథలో కనిపించలేదని బాబీ నిజాయితీగా చెప్పారు.
దీంతో చిరంజీవి “నువ్వు చూసిన చిరంజీవి ఎప్పుడు వస్తాడు? ఆ కథ ఎప్పుడు చెబుతావు?” అని బాబీకి సవాలు విసిరారు. 20 రోజుల్లో తిరిగి వస్తానని బాబీ మాటిచ్చారు. తనకు, తన బృందానికి ఇది నిజంగా ఒక అగ్ని పరీక్షగా మారిందని బాబీ గుర్తు చేసుకున్నారు. అప్పటికే గబ్బర్ సింగ్ కథ తనది కాకపోవడం వల్ల విజయం సాధించినా సంతృప్తి లేదని, అలాగే వెంకీ మామ కూడా భారీ విజయం కాదని బాబీ పేర్కొన్నారు. 20 రోజుల తర్వాత, బాబీ చిరంజీవికి ఒక సముద్రపు దొంగ కథను వివరించారు. ఓడలు, తాడులతో ఎక్కడం, ఏడుగురు సభ్యుల బృందం, ఫైట్లు, చిరంజీవి లుంగీలో కత్తితో డ్యాన్స్ చేస్తూ చేసే ఫైట్ సీక్వెన్స్ వంటి వివరాలను అందించారు. కథ చెప్పేటప్పుడు చిరంజీవి నిద్రపోతున్నారేమోనని బాబీ ఆందోళన చెందారు. కాసేపటికి “నువ్వు చెప్పిన చిరంజీవి క్యారెక్టర్ బాగుంది కానీ, కథకు సోల్ లేదు” అని చిరంజీవి స్పష్టం చేశారు. 20 రోజుల్లో సిద్ధం చేశానని, మీరు ఓకే చెబితే సోల్ క్రియేట్ చేస్తానని బాబీ సమాధానం ఇచ్చారు.
ఆ తర్వాత మైత్రీ మూవీ మేకర్స్ నవీన్ యెర్నేని, చిరంజీవితో మాట్లాడగా, చిరంజీవి క్యారెక్టర్ బాగుందని, బాబీ చేయగలడని, కానీ కథకు సమయం పడుతుందని చెప్పినట్లు వెల్లడించారు. అక్కడి నుండి వాల్తేరు వీరయ్య ప్రాజెక్ట్ చర్చలు ప్రారంభమయ్యాయి. సోల్ క్రియేట్ చేయడానికి ఒకటిన్నర నుండి రెండు నెలలు పట్టిందని బాబీ తెలిపారు. ఈ సమయంలోనే లాక్డౌన్ రావడంతో, ఇంట్లో కూర్చొని పూరీ జగన్నాథ్ వంటి వారితో సినిమాలు, సిరీస్ల గురించి చర్చించుకుంటూ కొత్త కథలపై దృష్టి సారించారు. లాక్డౌన్ పూర్తయ్యే ముందు, క్లైమాక్స్ లో విలన్ ట్రాక్ బలంగా ఉండాలని చిరంజీవి సూచించారు. రెండు వెర్షన్ల విలన్ ట్రాక్లు సిద్ధం చేశారు. ఈ క్రమంలోనే, కథ మరింత బలపడటానికి రవితేజ వంటి బలమైన నటుడి పాత్ర అవసరమని భావించి, వాల్తేరు వీరయ్య కథను పూర్తి చేశారని బాబీ వివరించారు.
ఇది చదవండి: కూలీ పనులకు వెళ్లే రైతులకు దూరంలో మసకగా కనిపించింది.. దగ్గరకెళ్లి పరిశీలించగా