హిందూ మతంలో వారంలోని ప్రతి రోజు ఆయా దేవతలకు అంకితం చేయబడింది. వారంలోని ఏడు రోజుల్లో ప్రతి ఒక్కటి ప్రత్యేక ప్రాముఖ్యతను కలిగి ఉంటుంది. ఒకటి లేదా అంతకంటే ఎక్కువ మంది హిందూ దేవతలకు ఈ రోజులు విభజించబడ్డాయి. అలాగే ఈ రోజుల్లో పాటించే ఆచార వ్యవహారాలు కూడా ఎన్నో ఉన్నాయి. జాతకంలో గ్రహ స్థానాలను బలోపేతం చేసుకోవడానికి, దారిద్ర్యాన్ని దూరం చేసుకోవడానికి కొన్ని పనులు చేయకూడదని, మరికొన్ని పనులు తప్పక చేయాలని ధర్మ శాస్త్రాలు సూచిస్తున్నాయి. ఆదివారం గ్రహాల రాజుగా పరిగణించబడే సూర్య భగవానుడికి అంకితం చేయబడింది. సూర్య భగవానుడి అనుగ్రహం పొందిన వ్యక్తులు జీవితంలో పురోగతిని సాధిస్తారని, అన్ని సమస్యలు తొలగి ఇంట్లో సుఖ సంపదలు ఉంటాయని విశ్వాసం. ఆదివారం సూర్య భగవానుడి పూజకు ప్రత్యేక శ్రద్ధ పెట్టడం చాలా ముఖ్యం. అయితే, ఆదివారం పొరపాటున కూడా చేయకూడని కొన్ని పనులు ఉన్నాయి. వీటిని చేయడం వలన అనేక కష్టనష్టాలు ఎదుర్కోవాల్సి వస్తుందని పేర్కొంటున్నారు.
అమ్మకూడని, కొనకూడని వస్తువులు
సూర్య భగవానుడికి సంబంధించిన రాగి వస్తువులను అమ్మకూడదు. వీటిని అమ్మడం వల్ల జాతకంలో సూర్యుని స్థానం బలహీనపడుతుంది. నీలం, గోధుమ, నలుపు రంగుల దుస్తులను ధరించవద్దు. ఈ రంగులు శ్రేయస్కరం కాదు. హిందూ సనాతన ధర్మంలోని నమ్మకాల ప్రకారం ఆదివారం జుట్టు కత్తిరించుకోవడం కూడా శుభప్రదంగా పరిగణించబడదు. దీనివల్ల ప్రతి పనికి ఆటంకం ఏర్పడి ఇబ్బంది పడాల్సి వస్తుంది. పడమర దిశలో ప్రయాణించడం మానుకోవాలి, ఎందుకంటే ఈ రోజున శూలం పశ్చిమ దిశలో ఉంటుంది. ఆలస్యంగా మేల్కొనడం కూడా జాతకంలో సూర్యుడి స్థానాన్ని బలహీనపరుస్తుంది. ఆదివారం ఉప్పు వాడకం, ముఖ్యంగా సూర్యాస్తమయం తర్వాత, సరైనది కాదు. ఇది ప్రతి పనిలో ఆటంకాలను కలిగిస్తుందని నమ్ముతారు.
బుధవారం: గణపతికి అంకితం
హిందూ మతంలో వారంలో ప్రతి రోజును ఆయా దేవతలకు అంకితం చేయడం జరిగింది. జీవితంలో విఘ్నాలను తొలగించే గణపతిని బుధవారం నాడు పూజిస్తారు. ఈ రోజున గణేశుని పూజించడం వలన జీవితంలో అన్ని అడ్డంకులు తొలగిపోయి అంతా శుభమే కలుగుతుందని విశ్వాసం. జాతకంలో బుధ గ్రహ స్థానం బలహీనంగా ఉంటే జీవితంలో అనేక సమస్యలు ఎదుర్కోవలసి వస్తుంది. బుధుడు స్థానాన్ని సరిచేయడానికి కొన్ని విషయాలను తప్పక గుర్తుంచుకోవాల్సి ఉంటుంది. బుధవారం నాడు పొరపాటున కూడా కొత్త బట్టలు, కొత్త బూట్లు, చెప్పులు కొనకూడదు. ఇలా చేయడం వల్ల ఆర్థిక సమస్యలు తలెత్తుతాయి.
అలాగే బుధవారం నాడు ఎవరికీ అప్పు ఇవ్వకూడదు. ఈ రోజు రుణం ఇవ్వడం వల్ల డబ్బు కొరత ఏర్పడుతుంది. అప్పు తిరిగి పొందడం కూడా కష్టంగా మారుతుంది. జుట్టుకు సంబంధించిన దువ్వెన, నూనె, హెయిర్ డ్రైయర్, బ్రష్, సబ్బు వంటివి బుధవారం కొనుగోలు చేయకూడదు. ఇలా చేయడం వల్ల జాతకంలో బుధుడు మరింత బలహీన పడతాడు. డబ్బుల కొరతతో సతమతం అవుతుంటే.. బుధవారం నాడు పాలతో చేసిన వస్తువులు కొని ఇంటికి తీసుకురాకూడదు. ఇంట్లో కూడా చేయకూడదు. ఈ రోజున పాల ఉత్పత్తులను కొనుగోలు చేయడం వలన ఆర్థిక సమస్యలు మరింత పెరిగే అవకాశం ఉంది.
(Disclaimer: ఈ వార్తలోని సమాచారం జ్యోతిష్య శాస్త్రం, మత సంబంధమైన అంశాలపై ఆధారపడి ఉంది. దీనిని టీవీ9 తెలుగు ధృవీకరించదు.)