మనం వేసుకునే చెప్పులు మన వ్యక్తిత్వాన్నే కాదు.. మన తలరాతను కూడా మారుస్తాయంటే మీరు నమ్ముతారా..? అవును.. వాస్తు శాస్త్రం ప్రకారం మనం వాడే పాదరక్షలకు, మన ఇంటి సంపదకు, శ్రేయస్సుకు విడదీయలేని సంబంధం ఉంది. చాలామంది తెలియక చేసే చిన్న చిన్న పొరపాట్లు.. అంటే చెప్పులను ఎక్కడపడితే అక్కడ విడవటం, కొన్ని ప్రత్యేక రోజుల్లో కొత్తవి కొనడం వల్ల ఇంట్లోకి దరిద్రాన్ని ఆహ్వానిస్తున్నారని వాస్తు నిపుణులు హెచ్చరిస్తున్నారు. అమావాస్య రోజున చెప్పులు కొంటే ఏం జరుగుతుంది? ఇంటి ప్రధాన ద్వారం వద్ద చెప్పులు ఉంచడం వల్ల లక్ష్మీదేవి ఎందుకు ఆగ్రహిస్తుంది? మీ ఇంట్లో ఆర్థిక ఇబ్బందులు, తరచూ గొడవలు జరుగుతున్నాయా? అయితే దానికి మీరు వేసుకునే చెప్పులే కారణం కావచ్చు!
ఈ రోజుల్లో అస్సలు కొనొద్దు..
జ్యోతిష్య శాస్త్రం ప్రకారం.. కొన్ని ప్రత్యేక రోజుల్లో పాదరక్షలు కొనడం అరిష్టంగా పరిగణిస్తారు. అమావాస్య, మంగళవారం, శనివారం, గ్రహణం ఉన్న రోజుల్లో కొత్త బూట్లు లేదా చెప్పులు అస్సలు కొనకూడదు. ఈ రోజుల్లో ప్రతికూల గ్రహాల ప్రభావం ఎక్కువగా ఉంటుంది. ఈ సమయంలో పాదరక్షలు కొంటే ఇంట్లో తగాదాలు పెరగడమే కాకుండా ఆరోగ్య సమస్యలు మరియు ధన నష్టం కలిగే అవకాశం ఉందని పండితులు చెబుతున్నారు.
షూ రాక్ ఎక్కడ ఉండాలి? వాస్తు నియమాలు ఇవే
ఇంట్లో లక్ష్మీదేవి కటాక్షం ఉండాలన్నా, ప్రశాంతత నెలకొనాలన్నా పాదరక్షల విషయంలో ఈ నియమాలు పాటించాలి:
ప్రధాన ద్వారం వద్ద వద్దు: ఇంటి ప్రధాన ద్వారం లోపల చెప్పులు విడవకూడదు. ఇది ఇంటికి వచ్చే సానుకూల శక్తిని అడ్డుకుంటుంది. ఎల్లప్పుడూ ఇంటి బయట లేదా ప్రత్యేకంగా ఏర్పాటు చేసిన షూ రాక్లోనే ఉంచాలి.
ప్రార్థనా స్థలం: దేవుడి గది లేదా పూజ స్థలం దగ్గరకు చెప్పులతో వెళ్లడం లేదా అక్కడ చెప్పులు ఉంచడం మహా పాపంగా, వాస్తు దోషంగా పరిగణిస్తారు.
తలక్రిందులుగా ఉండకూడదు: చెప్పులు ఎప్పుడూ తలక్రిందులుగా పడి ఉండకూడదు. ఇలా ఉంటే ఇంట్లో గొడవలు జరుగుతాయని, దారిద్య్రం వస్తుందని నమ్ముతారు.
చిరిగిన చెప్పులు: పాడైపోయిన లేదా చిరిగిన చెప్పులను ఇంట్లో ఉంచుకోకూడదు. ఇవి శని ప్రభావానికి కారణమవుతాయి. వెంటనే వాటిని తొలగించడం మంచిది.
రాత్రిపూట నియమం
రాత్రి సమయంలో చెప్పులను పద్ధతిగా, ఇంటి బయట ఉంచడం శుభప్రదంగా పరిగణించబడుతుంది. చెప్పులు, బూట్ల విషయంలో ఈ చిన్న చిన్న జాగ్రత్తలు పాటిస్తే.. ఇంట్లో ప్రతికూల శక్తి తొలగిపోయి ఆనందం, శాంతి, శ్రేయస్సు లభిస్తాయని వాస్తు నిపుణులు సూచిస్తున్నారు.
పాదరక్షల విషయంలో వాస్తు నియమాలు పాటించడం వల్ల మనకు తెలియకుండానే ఇంటి వాతావరణంలో సానుకూల మార్పులు వస్తాయి. నమ్మకం ఉన్నవారు ఈ నియమాలను పాటించి ఆర్థిక, మానసిక సమస్యల నుండి ఉపశమనం పొందవచ్చు.