ఇరాన్పై ఇజ్రాయెల్ దాడి జరిగిన రోజున ఉదయం ఇజ్రాయెల్ వైమానిక దళానికి చెందిన ఎఫ్-15 ఈగిల్ ఫైటర్ జెట్లు టేకాఫ్ తీసుకున్నట్లు సమాచారం. అనంతరం టెహ్రాన్ కేంద్ర ప్రాంతాన్ని లక్ష్యంగా చేసుకుని క్షిపణులు ప్రయోగించారని రిపోర్టులు పేర్కొంటున్నాయి. సుమారు ఉదయం 9.40 గంటల సమయంలో మొదటి క్షిపణి ప్రయోగం జరిగిందని కథనాలు చెబుతున్నాయి. ఆ తర్వాత ఖమేనీ ఉన్న ప్రాంగణాన్ని లక్ష్యంగా చేసుకుని పలు కచ్చితమైన దాడులు జరిపినట్లు సమాచారం.
దాడి జరిగిన కొద్దిసేపటికే టెహ్రాన్లోని ఖమేనీ నివాసం పరిసర ప్రాంతాల్లో భారీ పేలుళ్లు, పొగలు కనిపించిన వీడియోలు సోషల్ మీడియాలో వైరల్ అయ్యాయి. ఆ ప్రాంతంలోని కొన్ని భవనాలు కూడా దెబ్బతిన్నట్లు రిపోర్టులు వెల్లడించాయి.ఈ ఆపరేషన్ విజయానికి ఇజ్రాయెల్ గూఢచారి సంస్థ మొస్సాద్, అలాగే సైబర్ ఇంటెలిజెన్స్ యూనిట్ల సమాచార సేకరణ కీలకంగా పనిచేసినట్లు విశ్లేషణలు చెబుతున్నాయి. ఖమేనీ సమావేశం జరుగుతున్న సమయాన్ని కచ్చితంగా గుర్తించిన తర్వాతే దాడి చేసినట్లు చెబుతున్నారు.
బ్లూ స్పారో క్షిపణి ప్రత్యేకతలు
బ్లూ స్పారోను అత్యాధునిక క్వాజి బాలిస్టిక్ క్షిపణిగా పరిగణిస్తారు. దాదాపు 1240 మైళ్ల దూరం వరకు ప్రయాణించే సామర్థ్యం దీనికి ఉందని సమాచారం. గగనతల రక్షణ వ్యవస్థలను తప్పించుకునేలా మధ్యలో తన మార్గాన్ని మార్చుకునే సాంకేతికత దీనిలో ఉంటుంది. ఈ క్షిపణి ప్రయోగించిన తర్వాత ముందుగా చాలా ఎత్తుకు ఎగసి, అక్కడి నుంచి నిటారుగా లక్ష్యంపై అత్యంత వేగంతో దాడి చేస్తుంది. ఈ విధమైన ప్రయాణ విధానం వల్ల దీన్ని ముందుగానే గుర్తించడం రక్షణ వ్యవస్థలకు కష్టం. ఇజ్రాయెల్ అభివృద్ధి చేసిన స్పారో క్షిపణి కుటుంబంలో బ్లాక్ స్పారో, సిల్వర్ స్పారోతో పాటు బ్లూ స్పారో కూడా ఒకటి. సుమారు 6.5 మీటర్ల పొడవు, 1.9 టన్నుల బరువు ఉన్న ఈ క్షిపణిని ఎఫ్-15 వంటి ఫైటర్ జెట్ల నుంచి ప్రయోగించవచ్చు.
ఖమేనీపై దాడి ముందుగానే ప్రణాళిక?
ఇరాన్ సుప్రీం లీడర్పై దాడి ఆలోచన 2025 నవంబర్ నుంచే రూపుదిద్దుకుందని కొన్ని అంతర్జాతీయ రిపోర్టులు చెబుతున్నాయి. సరైన సమయం కోసం వేచి చూసిన తర్వాత పరిస్థితులు అనుకూలంగా మారడంతో ఆపరేషన్ అమలు చేశారని పేర్కొంటున్నాయి. ఇరాన్లో అంతర్గత అస్థిరత పెరిగిన సమయంలో ఈ ఆపరేషన్ను ముందుకు తీసుకువచ్చారని విశ్లేషణలు సూచిస్తున్నాయి. ఇరాన్ అణు కార్యక్రమాన్ని అడ్డుకోవడమే ఈ వ్యూహం వెనుక ప్రధాన లక్ష్యమని భద్రతా వర్గాలు చెబుతున్నాయి
మరిన్ని అంతర్జాతీయ వార్తల కోసం ఇక్కడ క్లిక్ చేయండి.