ప్రముఖ సైకియాట్రిస్ట్ డాక్టర్ డానియల్ గ్రెగొరీ అమెన్ తన ఇన్ స్టాగ్రామ్ వేదికగా పంచుకున్న మార్నింగ్ రూటీన్ సూత్రాలు ఇప్పుడు నెట్టింట వైరల్ అవుతున్నాయి. ప్రతిరోజూ ఉదయం మీరు కళ్లు తెరవగానే మీ మనసులో వచ్చే మొదటి ఆలోచన ఏంటి? “ఈరోజు కూడా ఆఫీసు ఉందా?” లేదా “మళ్ళీ పనుల ఒత్తిడి మొదలైందా?” అని అనుకుంటున్నారా? అయితే మీరు మీ రోజును ఓటమితో మొదలుపెడుతున్నట్లే. మన మానసిక స్థితిని, ఏకాగ్రతను మెరుగుపరిచే ఒక అద్భుతమైన మార్నింగ్ రూటీన్ ను ప్రపంచ ప్రఖ్యాత సైకియాట్రిస్ట్ ఒకరు పరిచయం చేశారు. కేవలం కొన్ని నిమిషాల శారీరక శ్రమ, ఒక గ్లాసు నీరు మీ మెదడును ఎలా రీఛార్జ్ చేస్తాయో తెలిస్తే మీరు ఆశ్చర్యపోతారు.
- డాక్టర్ అమెన్ చెప్పే మొదటి సూత్రం మన ఆలోచనా సరళికి సంబంధించింది. “ఈరోజు అద్భుతంగా ఉండబోతోంది” అని మీకు మీరు చెప్పుకుంటూ రోజును ప్రారంభించాలని ఆయన సూచిస్తున్నారు. ఈ పాజిటివ్ మైండ్సెట్ మీ మెదడును పనుల పట్ల ఉత్సాహంగా ఉండేలా సిద్ధం చేస్తుంది.
- నిద్రలేవగానే బయటకు వెళ్లి ప్రకృతి సిద్ధమైన సూర్యరశ్మి తగిలేలా చూసుకోవాలి. ఇది మెటబాలిజంను పెంచడమే కాకుండా, శరీరానికి అవసరమైన విటమిన్ డిని అందించి మూడ్ను మెరుగుపరుస్తుంది. గడ్డకట్టే చలి ఉంటే తప్ప, ఉదయాన్నే చిన్నపాటి నడకను అలవాటు చేసుకోవడం వల్ల శరీరంతో పాటు మెదడు కూడా యాక్టివ్ అవుతుంది.
- శరీరాన్ని డీటాక్సిఫై చేయడానికి ఉదయాన్నే ఒక పెద్ద గ్లాసు నీటిలో సగం నిమ్మకాయ పిండుకుని తాగాలని డాక్టర్ అమెన్ సలహా ఇస్తున్నారు. ఇది శరీరంలోని వ్యర్థాలను తొలగించి, రోజంతా హైడ్రేటెడ్ గా ఉండేలా చేస్తుంది.
- ఆహారం విషయంలో కూడా ఆయన కఠినమైన నియమాలు పాటిస్తారు. ఎనర్జీ స్థిరంగా ఉండటం కోసం తన రోజును ప్రోటీన్ మరియు హెల్తీ ఫ్యాట్స్తో ప్రారంభిస్తారు. మూడు గుడ్లు లేదా ప్రోటీన్ షేక్ తీసుకోవడం ఆయనకు ఇష్టం. అంతేకాకుండా, ఇంటర్మిటెంట్ ఫాస్టింగ్ చేసేవారు 12 నుండి 16 గంటల విరామం తర్వాత ఆలస్యంగా అల్పాహారం తీసుకోవడం కూడా మంచిదేనని ఆయన పేర్కొన్నారు.
మనం చేసే ప్రతి పనిలోనూ, తినే ప్రతి ఆహారం విషయంలోనూ ఒక ప్రశ్న వేసుకోవాలని ఆయన కోరుతున్నారు. “నేను చేస్తున్న ఈ పని నా మెదడుకు మంచిదా? లేదా చెడ్డదా?”. ఈ ఒక్క స్పృహ ఉంటే చాలు.. మనం అనారోగ్యకరమైన అలవాట్లకు దూరంగా ఉండవచ్చు. సూర్యరశ్మి, నీరు, సమతుల్య ఆహారం మరియు స్పష్టమైన ఆలోచన.. ఇవే సక్సెస్ ఫుల్ లైఫ్ కు పునాదులు. డాక్టర్ అమెన్ సూచించిన ఈ చిన్న చిన్న మార్పులను మీ దైనందిన జీవితంలో చేర్చుకుంటే మెరుగైన మానసిక ఆరోగ్యాన్ని, ఏకాగ్రతను సొంతం చేసుకోవచ్చు.
