Auqib Nabi India Debut Update: రంజీ ట్రోఫీ 2025-26లో అద్భుత ప్రదర్శనతో ఔకిబ్ నబీ పేరు దేశవ్యాప్తంగా చర్చనీయాంశమైంది. జమ్మూ, కాశ్మీర్ తరపున ఈ సీజన్లో 17 ఇన్నింగ్స్లలో 60 వికెట్లు తీసి 2.65 ఎకానమీ రేట్, 28 స్ట్రైక్ రేట్ నమోదు చేశాడు. అతని ప్రదర్శన జట్టుకు తొలి రంజీ టైటిల్ అందించడంలో కీలక పాత్ర పోషించింది.
బెంగాల్పై జరిగిన ఫైనల్లో జమ్మూ, కాశ్మీర్ విజయం సాధించడంలో నబీ ప్రధాన పాత్ర వహించాడు. దీంతో అతనికి టీమిండియా టెస్ట్ జట్టులో అవకాశం దక్కుతుందా? అన్న ప్రశ్న ఇప్పుడు బీసీసీఐ ముందు నిలిచింది. బీసీసీఐ అధ్యక్షుడు మిథున్ మాన్హాస్ కూడా నబీ ఎంపికపై ఆశాభావం వ్యక్తం చేశారు.
రంజీ ట్రోఫీలో ఔకిబ్ నబీ అద్భుత ప్రదర్శన..
29 ఏళ్ల నబీ ఇప్పటికే 40 ఫస్ట్ క్లాస్ మ్యాచ్లు ఆడాడు. ఎడమచేతి, కుడిచేతి బ్యాటర్లకు లేట్ స్వింగ్ కలిగించగల సామర్థ్యం అతనికి ఉంది. రెండు వైపులా బంతిని స్వింగ్ చేయగలడు. ఇది ముఖ్యంగా విదేశీ పిచ్లపై (SENA దేశాల్లో) భారత జట్టుకు ఉపయోగకరంగా మారవచ్చు.
ఈ సీజన్లో 6 సార్లు 5 వికెట్లు సాధించగా, రెండు మ్యాచ్ల్లో ఒక్క ఇన్నింగ్స్లో 7 వికెట్లు తీసి మధ్యప్రదేశ్, రాజస్థాన్ బ్యాటింగ్ లైనప్ను కుదేలు చేశాడు.
మిథున్ మాన్హాస్ స్పందన..
నబీ ప్రదర్శనపై మిథున్ మాన్హాస్ మాట్లాడుతూ, “అతను ఈ ఏడాది మాత్రమే కాదు, గత ఏడాది కూడా అద్భుతంగా ఆడాడు. ఫస్ట్ క్లాస్తో పాటు ఇతర ఫార్మాట్లలోనూ స్థిరంగా రాణిస్తున్నాడు. అతని ప్రదర్శనకు తగిన ఫలితం తప్పకుండా దక్కుతుంది. సెలెక్టర్లు అతనిపై దృష్టి ఉంచుతున్నారు,” అని తెలిపారు. దీంతో నబీకి త్వరలోనే భారత జట్టులో అవకాశం దక్కే సూచనలు కనిపిస్తున్నాయి.
దేశీయ క్రికెట్లో డ్రీమ్ రన్..
సయ్యద్ ముష్తాక్ అలీ ట్రోఫీలో 15 వికెట్లు (సగటు 13.26), విజయ్ హజారే ట్రోఫీలో 7 మ్యాచ్ల్లో 14 వికెట్లు (సగటు 22.85) సాధించాడు. అన్ని ఫార్మాట్లలోనూ తన ప్రతిభను నిరూపించాడు. అతని ప్రతిభకు గుర్తింపుగా ఐపీఎల్ 2026 వేలంలో ఢిల్లీ క్యాపిటల్స్ అతనిని రూ. 8.40 కోట్లకు కొనుగోలు చేసింది.
టీమిండియాకు నబీ అవసరమా..?
భారత్ టెస్ట్ జట్టులో జస్ప్రీత్ బుమ్రాపై ఎక్కువగా ఆధారపడుతోంది. బుమ్రా వర్క్లోడ్ సమస్యలు జట్టుకు కొన్ని సందర్భాల్లో ఇబ్బందులు తెచ్చాయి. మొహమ్మద్ సిరాజ్ మాత్రమే బుమ్రాకు తోడుగా నిలుస్తున్నాడు.
ఇలాంటి సమయంలో ఔకిబ్ నబీ వంటి యువ పేసర్ జట్టులోకి వస్తే భారత బౌలింగ్ దాడికి కొత్త దృక్పథం, అదనపు బలం లభిస్తుంది. విదేశీ పిచ్లపై కూడా అతని స్వింగ్ సామర్థ్యం భారత్కు ఉపయోగపడే అవకాశముంది. మొత్తానికి, ఔకిబ్ నబీకి టీమిండియా డెబ్యూ దూరంలో లేదనే సంకేతాలు కనిపిస్తున్నాయి.
మరిన్ని క్రీడా వార్తల కోసం ఇక్కడ క్లిక్ చేయండి..
