ఐసీసీ మెన్స్ టీ20 ప్రపంచకప్ 2026 (ICC Men’s T20 World Cup) సూపర్ స్టేజ్లో పాకిస్థాన్, శ్రీలంక మ్యాచ్ తీవ్ర చర్చలకు దారితీసింది. పాకిస్థాన్ ఓపెనర్లు ఫఖార్ జమాన్ (Fakhar Zaman), ఫర్హాన్ (Sahibzada Farhan) కలిసి టీ20 వరల్డ్ కప్ చరిత్రలో తమ జట్టుకు అత్యధిక ఓపెనింగ్ భాగస్వామ్యాన్ని నమోదు చేశారు. మొదటి వికెట్కు 170 పరుగులు జోడించి పటిష్ట ఆరంభం ఇచ్చారు.
మ్యాచ్కు ముందు పాకిస్థాన్ సెమీఫైనల్కు చేరాలంటే 65 పరుగుల తేడాతో గెలవాల్సిన పరిస్థితి. ప్రారంభంలో అది కష్టంగా కనిపించినా, ఆట మొదలైన తర్వాత కొన్ని సంఘటనలు సోషల్ మీడియాలో పెద్ద చర్చకు దారితీశాయి.
DRS ఘటనతో ‘మ్యాచ్ ఫిక్స్’ ట్రెండ్..
11వ ఓవర్లో జరిగిన ఒక సంఘటన అభిమానులను ఆగ్రహానికి గురిచేసింది. దసున్ షనకా (Dasun Shanaka) స్పష్టమైన ఎడ్జ్ ఉన్నప్పటికీ రివ్యూ తీసుకోకపోవడం చర్చనీయాంశమైంది.
ఇవి కూడా చదవండి
ఆ ఓవర్ చివరి బంతిని మహీష్ తీక్షన్ (Maheesh Theekshana) వైడ్గా విసిరాడు. ఫఖర్ జమాన్ దాన్ని ఆడేందుకు ప్రయత్నించినా బంతిని మిస్ చేశాడు. వికెట్ కీపర్ ఎడ్జ్ ఉందని నమ్మినా, కెప్టెన్ రివ్యూ తీసుకోలేదు. రీప్లేలో స్పష్టమైన స్పైక్ కనిపించడంతో అభిమానులు షాక్కు గురయ్యారు. వెంటనే సోషల్ మీడియాలో “మ్యాచ్ ఫిక్స్” హ్యాష్ట్యాగ్ ట్రెండ్ అయ్యింది.
క్యాచ్లు వదలడం, ఫీల్డింగ్ లోపాలు..
డీఆర్ఎస్ ఘటన మాత్రమే కాదు. ఆ తర్వాత కూడా శ్రీలంక ఫీల్డర్లు సులభమైన క్యాచ్లను వదిలేశారు. దనిత్ వెల్లలాగే (Dunith Wellalage) సాహిబ్జాదా ఫర్హాన్ ఇచ్చిన సులభమైన అవకాశం చేజార్చగా, చరిత్ అసలంకా (Charith Asalanka) కూడా సాధారణ క్యాచ్ను పట్టుకోలేకపోయాడు.
ఇవి అన్నీ కలిసి అభిమానుల ఆగ్రహానికి కారణమయ్యాయి. కొందరు ఐసీసీ దర్యాప్తు చేయాలని డిమాండ్ చేశారు. మరికొందరు ఆదాయం, హోస్టింగ్ హక్కుల కోసం ఉద్దేశపూర్వకంగా ఓడుతున్నారని ఆరోపణలు చేశారు.
చెడు ఆరంభం తర్వాత శ్రీలంక పోరాటం..
15 ఓవర్లకు పాకిస్థాన్ 163/0తో భారీ స్కోర్ వైపు దూసుకెళ్తోంది. నిపుణులు 250+ స్కోర్ సాధ్యమని అంచనా వేశారు. అయితే చివరి ఐదు ఓవర్లలో శ్రీలంక బౌలర్లు గట్టిగా పుంజుకుని 34 పరుగులకే 8 వికెట్లు తీశారు.
ఫలితంగా పాకిస్థాన్ 20 ఓవర్లకు 212/8కే పరిమితమైంది. దిల్హాన్ మధుశంక (Dilshan Madushanka) 4 ఓవర్లలో 3/33 గణాంకాలతో మెరిశాడు. అయితే పాకిస్థాన్ తరపున ఫర్హాన్ శతకం సాధించి టోర్నీలో ఒకే ఎడిషన్లో రెండు సెంచరీలు చేసిన తొలి ఆటగాడిగా నిలిచాడు.
సెమీఫైనల్ సమీకరణం..
ఇప్పుడీ మ్యాచ్లో పాకిస్థాన్ సెమీస్ చేరాలంటే శ్రీలంకను 147 పరుగుల లోపే ఆపాలి. అలా జరిగితేనే నెట్ రన్రేట్లో ముందంజ వేసి తదుపరి దశకు చేరగలదు. ఈ మ్యాచ్ చుట్టూ చర్చలు కొనసాగుతున్నప్పటికీ, మైదానంలో జరిగే ఆటే చివరికి నిర్ణయం తీసుకోనుంది.
మరిన్ని క్రీడా వార్తల కోసం ఇక్కడ క్లిక్ చేయండి..
