భారతీయ రైల్వే ప్రపంచంలోనే అతిపెద్ద రవాణా వ్యవస్థల్లో ఒకటి. ప్రతిరోజూ లక్షలాది మంది ప్రయాణికులను గమ్యస్థానాలకు చేర్చే ఈ భారీ వ్యవస్థను నడిపించడం అంత ఈజీ కాదు. గలు, రాత్రి అనే తేడా లేకుండా, వాతావరణ పరిస్థితులతో సంబంధం లేకుండా పట్టాల మీద రైలును నడిపించడం అంటే కేవలం ఉద్యోగం మాత్రమే కాదు.. అదొక భారీ బాధ్యత.
బాధ్యతలు – సవాళ్లు
ఒక లోకో పైలట్ పని ఆఫీసు పనిలా ఏమాత్రం ఉండదు. నిరంతరం సిగ్నల్స్ గమనించడం, వేగాన్ని నియంత్రించడం, కంట్రోల్ రూమ్ నుండి వచ్చే ప్రతి చిన్న సూచనను క్షణాల్లో పాటించడం వంటివి చాలా కీలకం. ఏ మాత్రం ఏమరపాటుగా ఉన్నా వేలాది మంది ప్రాణాలకు ప్రమాదం వాటిల్లే అవకాశం ఉంటుంది. అందుకే వీరికి అసాధారణమైన ఏకాగ్రత, దృష్టి, శారీరక దృఢత్వం చాలా అవసరం.
జీతభత్యాలు – ఆకర్షణీయమైన ప్యాకేజీలు
ఏడవ వేతన సంఘం ప్రకారం.. రైలు డ్రైవర్లకు జీతం చాలా గౌరవప్రదంగా ఉంటుంది.
అసిస్టెంట్ లోకో పైలట్: వీరి ప్రాథమిక జీతం నెలకు రూ. 19,900 నుండి ప్రారంభమవుతుంది.
సీనియర్ లోకో పైలట్: అనుభవం, పదోన్నతులను బట్టి వీరి ప్రాథమిక జీతం రూ. 35,000 నుండి రూ. 60,000 వరకు ఉంటుంది.
అదనపు ప్రయోజనాలు :
కేవలం మూల జీతం మాత్రమే కాకుండా, వీరికి అందే ఇతర అలవెన్సులు అదనం.
రన్నింగ్ అలవెన్స్: వారు ప్రయాణించే ప్రతి కిలోమీటరుకు ఈ ప్రత్యేక అలవెన్స్ లభిస్తుంది.
నైట్ షిఫ్ట్ – ఓవర్ టైమ్: రాత్రి పూట పని చేసినప్పుడు, అదనపు గంటలకు ప్రత్యేక పేమెంట్ ఉంటుంది.
DA, HRA – TA: కరువు భత్యం, ఇంటి అద్దె, రవాణా ఖర్చులు అన్నీ కలిపితే ఒక సీనియర్ లోకో పైలట్ నెలకు రూ. 70,000 నుండి రూ.1,00,000 పైగానే సంపాదిస్తారు.
కఠినమైన వైద్య పరీక్షలు – విశ్రాంతి
లోకో పైలట్ల పని ఒత్తిడి ఎక్కువగా ఉంటుంది కాబట్టి రైల్వే శాఖ వారి ఆరోగ్యంపై ప్రత్యేక దృష్టి సారిస్తుంది. అలసట వల్ల ప్రమాదాలు జరగకుండా ఉండేందుకు డ్యూటీ తర్వాత వీరికి తప్పనిసరి విశ్రాంతి సమయాలు ఉంటాయి. అంతేకాకుండా కంటి చూపు, మానసిక స్థితిని పరీక్షించడానికి క్రమం తప్పకుండా కఠినమైన వైద్య పరీక్షలు నిర్వహిస్తారు.
