భారత ప్రభుత్వం 8వ కేంద్ర వేతన సంఘం (CPC) అధికారిక వెబ్సైట్ ప్రారంభించడంతో వేతన సవరణ ప్రక్రియ అధికారికంగా మొదలైంది. ఈ పరిణామంతో జీతాల పెంపు, భత్యాల మార్పులు, పెన్షన్ మెరుగుదలలపై ఆశలు పెట్టుకున్న లక్షలాది మంది ఉద్యోగుల్లో ఉత్సాహం నెలకొంది. వెబ్సైట్ ప్రారంభం ద్వారా కమిషన్ సంప్రదింపుల ప్రక్రియ ప్రారంభ దశలోకి ప్రవేశించినట్లు స్పష్టమైంది. ఇప్పటికే కమిషన్కు ఢిల్లీలో కార్యాలయ స్థలం కేటాయించగా, ఇప్పుడు ఆన్లైన్ వేదిక యాక్టివ్ కావడంతో వేతన సంస్కరణలపై చర్చలు వేగం పుంజుకునే అవకాశముంది. ఈ వెబ్సైట్లో కమిషన్ కూర్పు, పాత్రలు, బాధ్యతలు వంటి కీలక వివరాలు అందుబాటులో ఉంచారు.
8వ వేతన సంఘానికి జస్టిస్ రంజనా ప్రకాష్ దేశాయ్ అధ్యక్షత వహిస్తున్నారు. ప్రొఫెసర్ పులక్ ఘోష్ పార్ట్టైమ్ సభ్యునిగా ఉండగా, పంకజ్ జైన్ సభ్య-కార్యదర్శిగా పనిచేస్తున్నారు. కేంద్ర మంత్రిత్వ శాఖలు, రాష్ట్ర ప్రభుత్వాలు, జాయింట్ కన్సల్టేటివ్ మెషినరీ కింద సిబ్బంది ప్రతినిధులతో సంప్రదింపుల తర్వాత కమిషన్ నిబంధనలు (ToR) ఖరారు చేసినట్లు వెబ్సైట్ వెల్లడించింది. వెబ్సైట్లో ముఖ్య ఆకర్షణల్లో ఒకటి పే కమిషన్ రిపోజిటరీ. దీని ద్వారా వినియోగదారులు 6వ, 7వ వేతన సంఘాల నివేదికలు డౌన్లోడ్ చేసుకునే అవకాశం పొందుతున్నారు. దీంతో ఉద్యోగులు, పెన్షనర్లు, పరిశోధకులు గత సిఫార్సులు పరిశీలించి వేతన నిర్మాణ పరిణామం అర్థం చేసుకునే వీలుంటుంది.
ఇదిలా ఉండగా, కమిషన్ పరిపాలనా వ్యవస్థ బలోపేతం చేసే దిశగా వివిధ పోస్టుల ఖాళీలకు సంబంధించిన సర్క్యులర్లు కూడా వెబ్సైట్లో ఉంచారు. ఇది కమిషన్ పనితీరు పూర్తి స్థాయిలో ప్రారంభానికి సిద్ధమవుతోందని సంకేతాలు ఇస్తోంది. మరోవైపు కేంద్ర ప్రభుత్వ ఉద్యోగులు, పెన్షనర్లు, మంత్రిత్వ శాఖలు, ఇతర వాటాదారుల నుంచి సూచనలు కమిషన్ చురుకుగా ఆహ్వానిస్తోంది. ఈ ప్రక్రియ పారదర్శకంగా చేయడానికి MyGov పోర్టల్తో భాగస్వామ్యం కుదుర్చుకుంది. అన్ని అభిప్రాయాలు ఆన్లైన్ ద్వారానే సమర్పించాల్సి ఉండగా, ఆఫ్లైన్ సమర్పణలు స్వీకరించబోమని స్పష్టం చేసింది. స్పందనలు గోప్యంగా ఉంచుతామని అధికారులు హామీ ఇచ్చారు.
అదనంగా, జీతాలు, భత్యాలు, పెన్షన్లపై అభిప్రాయాలు సేకరించేందుకు 18 ప్రశ్నలతో కూడిన నిర్మాణాత్మక ప్రశ్నాపత్రం కూడా విడుదల చేశారు. ఈ ప్రశ్నాపత్రానికి ప్రతిస్పందనలు సమర్పించేందుకు చివరి తేదీగా మార్చి 16, 2026 నిర్ణయించారు. మొత్తంగా చూస్తే 8వ కేంద్ర వేతన సంఘం వెబ్సైట్ ప్రారంభం వేతన సవరణ ప్రక్రియలో కీలక మైలురాయిగా భావిస్తున్నారు. తుది సిఫార్సులు దేశవ్యాప్తంగా కేంద్ర ప్రభుత్వ ఉద్యోగులు, పెన్షనర్ల ఆదాయం, పదవీ విరమణ ప్రయోజనాలపై గణనీయ ప్రభావం చూపనున్నాయి.
మరిన్ని బిజినెస్ వార్తల కోసం ఇక్కడ క్లిక్ చేయండి
