వృషభం: ఈ రాశికి రవి లాభ స్థానంలో సంచారం వల్ల ఆదాయం బాగా వృద్ధి చెందే అవకాశం ఉంది. రాజ పూజ్యాలు పెరుగుతాయి. రాజకీయ ప్రాబల్యం కలుగుతుంది. ఉద్యోగులకు తప్పకుండా అధికార యోగం పడుతుంది. అనారోగ్యాల నుంచి ఉపశమనం లభిస్తుంది. పిత్రార్జితం లభిస్తుంది. తండ్రి నుంచి సహాయ సహకారాలు అందుతాయి. ధార్మిక కార్యక్రమాలకు, సహాయ కార్యక్రమాలకు ఇతోధికంగా సహాయపడడం జరుగుతుంది. తీర్థయాత్రలు ఎక్కువగా చేసే అవకాశం కూడా ఉంది.
మిథునం: ఈ రాశికి దశమ స్థానంలో రవి సంచారం వల్ల దిగ్బల రాజయోగం కలిగింది. నిరుద్యోగులకు కొద్ది ప్రయత్నంతో విదేశీ ఉద్యోగం లేదా ప్రభుత్వ ఉద్యోగం లభించే అవకాశం ఉంది. రాజకీయాల్లో ఉన్న వారు ఏనుగు కుంభస్థలాన్ని కొట్టడం జరుగుతుంది. ఉద్యోగంలో పదోన్నతులు లభిస్తాయి. వృత్తి, ఉద్యోగాలరీత్యా విదేశాలకు వెళ్లే అవకాశం లభిస్తుంది. ఆలయాలను సందర్శించడం ఎక్కువవుతుంది. పోటీ పరీక్షలు, ఇంటర్వ్యూలలో ఘన విజయాలు సాధిస్తారు. పలుకుబడి విస్తరిస్తుంది.
కర్కాటకం: ఈ రాశికి ధన స్థానాధిపతి అయిన రవి భాగ్య స్థానంలో సంచారం చేయడం వల్ల ఈ రాశివారికి తప్పకుండా విదేశీ సంపాదన అనుభవించే యోగం పడుతుంది. వృత్తి, ఉద్యోగాల రీత్యా ఇతర దేశాలకు వెళ్లడం జరుగుతుంది. పెళ్లి ప్రయత్నాల్లో విదేశీ సంబంధం కుదురుతుంది. తండ్రి వైపు నుంచి ఆస్తి కలిసి వస్తుంది. ఆస్తి వివాదాలు, కోర్టు కేసులు అనుకూలంగా పరిష్కారమవుతాయి. గృహ, వాహన యోగాలకు అవకాశం ఉంది. యోగ సాధన, ఆధ్యాత్మిక చింతన పెరుగుతాయి.
వృశ్చికం: ఈ రాశికి దశమాధిపతి అయిన రవి పంచమ స్థానంలో ప్రవేశించడం వల్ల ఉద్యోగంలో మీ సమర్థతకు గుర్తింపు, మీ కష్టానికి తగ్గ ప్రతిఫలం లభిస్తాయి. ఉద్యోగంలో సరికొత్త నైపుణ్యాలను పెంపొం దించుకుంటారు. పిల్లలు వృద్ధిలోకి వస్తారు. సంతాన ప్రాప్తికి అవకాశం ఉంది. సంపన్న కుటుంబా నికి చెందిన వ్యక్తితో ప్రేమలో పడడం లేదా పెళ్లి కావడం జరుగుతుంది. షేర్లు, స్పెక్యులేషన్లు, ఆర్థిక లావాదేవీల వంటివి బాగా లాభిస్తాయి. ఆధ్యాత్మిక విషయాల మీద శ్రద్ధ బాగా పెరుగుతుంది.
ధనుస్సు: ఈ రాశికి భాగ్యాధిపతిగా అత్యంత శుభుడైన రవి చతుర్థ స్థానంలో ప్రవేశించడం వల్ల మనసులోని కోరికలు చాలావరకు నెరవేరుతాయి. సొంత ఇంటి కల నెరవేరడంతో పాటు విదేశాల్లో ఉద్యోగం చేయాలన్న కోరిక కూడా నెరవేరుతుంది. పోటీ పరీక్షల్లో ఘన విజయాలు సాధిస్తారు. విద్యార్థులు చదువుల్లో రికార్డులు సృష్టిస్తారు. ఆస్తి వివాదాలు అనుకూలంగా పరిష్కారమవుతాయి. తండ్రి వైపు నుంచి ఆస్తి, సంపద కలిసి వస్తాయి. ఆధ్యాత్మిక సేవల మీద బాగా ఖర్చు చేసే అవకాశం ఉంది.
కుంభం: ఈ రాశికి సప్తమాధిపతి అయిన రవి ధన స్థానంలో సంచారం ప్రారంభించడం వల్ల సంపన్న కుటుంబానికి చెందిన వ్యక్తితో ప్రేమలో పడడం లేదా పెళ్లి నిశ్చయం కావడం జరుగుతుంది. ఆదాయం బాగా వృద్ధి చెంది ముఖ్యమైన అవసరాలు తీరిపోవడంతో పాటు, ఆర్థిక, వ్యక్తిగత సమస్యలు పూర్తిగా పరిష్కారమవుతాయి. షేర్లు, స్పెక్యులేషన్లు లాభిస్తాయి. తీర్థయాత్రలు ఎక్కువగా చేస్తారు. సాధువుల మీద ఆసక్తి పెరుగుతుంది. ఉద్యోగంలో మీ సలహాలు వల్ల సంస్థ లబ్ధి పొందుతుంది.