ఒంటరిగా ఉన్నప్పుడు మనలో మనం మాట్లాడుకోవడం చాలామందికి ఉన్న అలవాటు. పనిలో నిమగ్నమైనప్పుడో లేదా బైక్ మీద వెళ్తున్నప్పుడో తెలియకుండానే పెదాలు కదులుతుంటాయి. ఎవరైనా చూస్తే పిచ్చి అనుకుంటారో అని భయపడి, వెంటనే ఆపేస్తుంటాం. కానీ, వైద్య ప్రపంచం చెబుతున్న మాట వింటే మీరు ఆశ్చర్యపోతారు. ఇలా మనతో మనం మాట్లాడుకోవడం మానసిక జబ్బు కాదు, పైగా అది మేధావుల లక్షణమని శాస్త్రీయంగా నిరూపితమైంది. ఈ వింత అలవాటు వల్ల మన మెదడుకు కలిగే అద్భుతమైన ప్రయోజనాలేంటో తెలుసుకుందాం..
ఆలోచనలకు స్పష్టత..
మెదడులో అయోమయం నెలకొన్నప్పుడు గట్టిగా మాట్లాడటం వల్ల ఆలోచనలు చక్కగా అమర్చబడతాయి. ఉదాహరణకు, ఇంటి తాళాలు ఎక్కడో పెట్టి వెతుకుతున్నప్పుడు.. “తాళాలు ఎక్కడ ఉన్నాయి?” అని గట్టిగా అనుకుంటూ వెతికితే, మన మెదడు ఆ వస్తువును చాలా త్వరగా గుర్తిస్తుంది. ఇది ఏకాగ్రతను పెంచడానికి ఒక గొప్ప ట్రిక్ అని పరిశోధకులు చెబుతున్నారు.
ఆఫీసులో బాస్ తిట్టినా లేదా ఇంట్లో ఎవరితోనైనా గొడవ జరిగినా ఆ బాధను లోపలే దాచుకోవడం ప్రమాదకరం. అలాంటప్పుడు ఒక గదిలో ఒంటరిగా కూర్చుని, జరిగిన విషయాన్ని మీతో మీరు మాట్లాడుకోవడం ఒక గొప్ప థెరపీలా పనిచేస్తుంది. ఇలా చేయడం వల్ల ఒత్తిడి త్వరగా తగ్గిపోతుంది. సమస్యను ఎలా పరిష్కరించుకోవాలో ఒక స్పష్టమైన నిర్ణయానికి రావడానికి ఇది ఎంతగానో సహకరిస్తుంది.
ఆత్మవిశ్వాసాన్ని పెంచే అస్త్రం
ఏదైనా కష్టమైన పని చేసే ముందు “నేను ఇది చేయగలను” అని గట్టిగా చెప్పుకోవడం వల్ల ఆత్మవిశ్వాసం రెట్టింపు అవుతుంది. క్రీడాకారులు మైదానంలోకి అడుగుపెట్టే ముందు తమలో తాము మాట్లాడుకోవడం మనం చూస్తుంటాం. ఇది వారికి ఒక గొప్ప బూస్ట్ను ఇస్తుంది. ఎవరో వచ్చి మనల్ని ప్రోత్సహించాలని చూడకుండా, మనకు మనమే ఒక మెంటార్లా మారి మోటివేట్ చేసుకోవడానికి ఈ అలవాటు ఒక అద్భుతమైన సాధనం.
మీతో మీరు మాట్లాడుకోవడం అనేది లోపం కాదు, అది మీ మెదడు ఎంత చురుగ్గా ఉందో చెప్పే సంకేతం. అనేక అధ్యయనాల ప్రకారం, ఎక్కువ తెలివితేటలు ఉన్నవారు తమలో తాము ఎక్కువగా మాట్లాడుకుంటారట. కాబట్టి, ఇకపై ఎవరైనా మిమ్మల్ని వింతగా చూసినా సంకోచించకండి. మీకంటే మంచి స్నేహితులు మీకు ఎవరూ ఉండరు, కాబట్టి మీతో మీరు నిరభ్యంతరంగా మాట్లాడుకోండి!