చాలా మందికి రోజును టీ లేదా కాఫీతో ప్రారంభించే అలవాటు ఉంటుంది. అయితే బరువు తగ్గాలనుకునే వారు చక్కెరను పూర్తిగా పక్కన పెట్టాలి. చక్కెర లేని నిమ్మకాయ టీ, బ్లాక్ కాఫీ లేదా బ్లాక్ టీ తీసుకోవడం ఉత్తమం. 100 మి.లీ పాలతో చక్కెర లేదా బెల్లం లేకుండా తాగవచ్చు.
మనం తినే ఇడ్లీ, దోసెలలో స్టార్చ్ ఎక్కువగా ఉంటుంది. దీనికి బదులుగా 100 గ్రాముల ఉడికించిన లేదా కాల్చిన వేరుశనగలు తినండి. ఇది స్టార్చ్ను భారీగా తగ్గించడమే కాకుండా ఇందులోని ప్రోటీన్ కడుపు నిండుగా ఉంచి త్వరగా ఆకలి వేయకుండా చేస్తుంది.
డైటింగ్ సమయంలో మధ్యలో ఆకలి వేయడం సహజం. ఆ సమయంలో చిరుతిండి జోలికి వెళ్లకుండా దోసకాయను ఎంచుకోండి. ఇందులో నీటి శాతం ఎక్కువ, కేలరీలు తక్కువ. ఇది మీ ఆకలిని చంపడమే కాకుండా శరీరాన్ని హైడ్రేటెడ్ గా ఉంచుతుంది.
మీరు ప్రతిరోజూ తినే అన్నాన్ని మూడు భాగాలుగా అనుకుంటే.. ఒక భాగం మాత్రమే అన్నం తిని, మిగిలిన రెండు భాగాలను కూరగాయలు, గుడ్లతో భర్తీ చేయండి. రెండు గుడ్లను ఉడికించి గానీ లేదా ఆమ్లెట్ రూపంలో గానీ తీసుకోవడం వల్ల శరీరానికి అవసరమైన ఫైబర్, ప్రోటీన్ అందుతాయి.
సాయంత్రం వేళ తియ్యని టీకి బదులు జామకాయ తినడం మేలు. ఇక రాత్రి పూట దోసెలు లేదా చపాతీల సంఖ్యను తగ్గించి.. వాటి స్థానంలో 100 గ్రాముల పచ్చి బఠానీలు, కాలీఫ్లవర్, పుట్టగొడుగులు లేదా చికెన్, పనీర్ చేర్చుకోవాలి. రాత్రి 8 గంటలలోపే భోజనం ముగిస్తే జీర్ణక్రియ సజావుగా సాగుతుంది.
ఆహార నియంత్రణతో పాటు రోజుకు కనీసం ఒక గంట నడవడం తప్పనిసరి. రోజుకు 3 నుండి 4 లీటర్ల నీరు తాగడం వల్ల శరీరంలోని మలినాలు బయటకు పోతాయి. ఒత్తిడి తగ్గడానికి, అవయవాల పనితీరు మెరుగుపడటానికి 6 నుండి 8 గంటల గాఢ నిద్ర అవసరం.