చాలా మంది చెవి సమస్యలను చాలా కాలంగా విస్మరిస్తారు.. కానీ, దీనివల్ల వారి చెవులకు అప్పటికే నష్టం జరుగుతుంది. అయితే.. రోజువారి అలవాల్లు చెవి దెబ్బతినేలా చేయడంతోపాటు, వినికిడిని కూడా ప్రభావితం చేస్తాయని నిపుణులు హెచ్చరిస్తున్నారు. అందుకే.. శరీరంలోని ఇతర భాగాల మాదిరిగానే, మీ చెవులను జాగ్రత్తగా చూసుకోవడం చాలా ముఖ్యం. అయితే, కొంతమంది రోజువారీ తప్పులు చేస్తారు.. ఇది వారి ఆరోగ్యం క్షీణించడానికి, చెవుడుకు కూడా దారితీస్తుందని నిపుణులు చెబుతున్నారు. చెవులకు హాని కలిగే రోజువారీ అలవాట్లు ఏంటి..? నిపుణులు ఏం చెబుతున్నారు.. ఆసక్తికర విషయాలను తెలుసుకుందాం..
చాలా మంది స్నానం చేసిన తర్వాత లేదా దురద పెట్టినప్పుడు కాటన్ బడ్స్తో చెవులను శుభ్రం చేసుకుంటారు. కానీ వీటిని ఎప్పుడూ చెవి లోపలి భాగం వరకు చొప్పించకూడదు. అలా చేయడం వల్ల చెవిలో గులిమిని తొలగించడానికి బదులుగా లోపలికి నెట్టివేస్తుంది. దీనివల్ల మూసుకుపోవడం లేదా చెవి ఇన్ఫెక్షన్ వస్తుంది. ఇంకా, అగ్గిపుల్లలు- హెయిర్పిన్లు వంటి వస్తువులను కూడా చెవిలోకి ఎప్పుడూ చొప్పించకూడదు.
మాక్స్ హాస్పిటల్లోని ENT విభాగం సీనియర్ కన్సల్టెంట్ డాక్టర్ సువెన్ కల్రా.. కాటన్ బడ్స్ వాడకాన్ని బయటి ప్రాంతానికి మాత్రమే పరిమితం చేయాలని సలహా ఇస్తున్నారు. మీరు తరచుగా చెవిలో గులిమి పేరుకుపోయినట్లు అనిపిస్తే, శుభ్రపరచడం కోసం ENT నిపుణుడిని సంప్రదించండి.
చెవుల్లో నూనె వేయకండి..
డాక్టర్ కల్రా ప్రకారం, చెవుల్లో కొబ్బరి లేదా నువ్వుల నూనె వేడయం మంచిదని ప్రజలు సాధారణంగా నమ్ముతారు.. కానీ ఇది నిజం కాదు. చెవుల్లో నూనె ఫంగల్ లేదా బాక్టీరియల్ ఇన్ఫెక్షన్లకు కారణమవుతుంది. చెవిలో నూనె వేయడం వల్ల ఇన్ఫెక్షన్ వచ్చిన సందర్భాలు ఉన్నాయి. అందువల్ల, వైద్యుడిని సంప్రదించకుండా చెవిలో ఎటువంటి ద్రవాన్ని వేయకపోవడం మంచిది..
ఎక్కువసేపు పెద్ద శబ్దాలు వినవద్దు..
వివాహాలలో బిగ్గరగా DJ మ్యూజిక్ లేదా హెడ్ఫోన్లను ఉపయోగించవద్దు. ఇయర్ఫోన్లు లేదా ఇయర్బడ్లను ఉపయోగిస్తున్నప్పుడు 60 నిమిషాల విరామం తీసుకోవడానికి ప్రయత్నించండి.. 60 డెసిబెల్స్ కంటే ఎక్కువ వాల్యూమ్లలో వినకుండా ఉండండి. మీకు చెవి నొప్పి, ఇన్ఫెక్షన్ లేదా చెవిలో చీము, దురద లాంటివి ఉంటే, ఎప్పుడూ స్వీయ వైద్యం చేసుకోకండి. నొప్పి నివారణ మందులు తీసుకునే ముందు వైద్యుడిని సంప్రదించండి.
వినికిడి లోపం – తలతిరగడం వంటి వాటిని విస్మరించడం
అకస్మాత్తుగా వినికిడి లోపం లేదా తలతిరగడం (వెర్టిగో) చెవి సమస్యకు సంకేతం కావచ్చు. వెర్టిగో చాలా తరచుగా లోపలి చెవితో సంబంధం కలిగి ఉంటుంది. ఇది సమతుల్యత, వినికిడి రెండింటినీ నియంత్రిస్తుంది. అకస్మాత్తుగా వినికిడి లోపం తీవ్రమైన తలతిరుగుతూ ఉంటే, ఎల్లప్పుడూ వైద్యుడిని సంప్రదించండి.
