నీ టైమ్ నడుస్తుందిరా బాబూ అన్నట్లు.. టాలీవుడ్‌లో సీక్వెల్స్ టైమ్ నడుస్తుందిప్పుడు. ప్రతీ కథకు కొనసాగింపు రాయడం అనేది కామన్ అయిపోయిందిప్పుడు. అఖండ 2 డిసెంబర్‌లోనే రానుంది. 600 మంది డాన్సర్లతో భారీ సెట్‌లో మాస్ సాంగ్ చిత్రీకరణ జరుగుతుందిప్పుడు. సీక్వెల్స్‌లో త్వరగా వస్తుంది అఖండ 2నే. మిగిలినవన్నీ కన్ఫ్యూజన్‌లోనే ఉన్నాయి.
దేవర 2 సినిమా ఉంటుందని మేకర్స్ చెప్తున్నారు కానీ వచ్చేవరకు అనుమానమే. కొరటాల శివ ఈ సినిమా స్క్రిప్ట్ పూర్తి చేసారు.. మరోవైపు ప్రశాంత్ నీల్ తర్వాత త్రివిక్రమ్, నెల్సన్ లాంటి దర్శకులకు గ్రీన్ సిగ్నల్ ఇచ్చారు.
ఇక సలార్ 2, కల్కి 2 కూడా ఇప్పట్లో లేనట్లే. ప్రభాస్ ప్రస్తుతం ఉన్న బిజీకి ఇవి మొదలవ్వడానికే ఏళ్లు పట్టేలా ఉంది. సలార్ 2 ఇప్పట్లో ఉండదని ప్రశాంత్ నీల్ కన్ఫర్మ్ చేసారు.. మరోవైపు కల్కి 2 కూడా అంత ఈజీ కాదని.. అందరి డేట్స్ దొరికిన తర్వాత కానీ దీన్ని మొదలుపెట్టలేం అంటున్నారు నాగ్ అశ్విన్.
ఇక జై హనుమాన్ అనౌన్స్ ఐతే చేసారు కానీ ఎప్పుడు పట్టాలెక్కుతుందో చెప్పడం కష్టమే. మరోవైపు మిరాయ్ 2 రావడానికి మూడేళ్లు పట్టే అవకాశం ఉంది.
ఇప్పటి వరకు మనం మాట్లాడుకున్న సీక్వెల్స్ అన్నీ ఇప్పుడో అప్పుడో వస్తాయనే నమ్మకం ఉంది.. కానీ పుష్ప 3, కేజియఫ్ 3 మాత్రం అసలు వస్తాయా అనే డౌట్ ఫ్యాన్స్‌లోనూ ఉంది. 2027లో పుష్ప 3 మొదలుపెడతానంటూ కన్ఫర్మ్ చేసారు సుకుమార్.. మరోవైపు కేజియఫ్ 3పై ప్రశాంత్ నీల్ అసలు నోరే మెదపట్లేదు. మొత్తానికి ఈ సీక్వెల్స్ అన్నీ ఉన్నాయి.. కానీ ఎప్పుడొస్తాయో తెలియదు.
