ప్రపంచవ్యాప్తంగా పెరుగుతున్న వ్యాధుల కారణంగా ఆరోగ్య సేవలపై అదనపు ఒత్తిడి కనిపిస్తోంది. ఇటీవలి నివేదికల ప్రకారం, ప్రస్తుతం న్యూయార్క్ నగరంలో లెజియోనైర్స్ అనే అరుదైన వ్యాధి వ్యాప్తి చెందుతోంది. దీని వలన తక్కువ సమయంలోనే పెద్ద సంఖ్యలో ప్రజలు బాధితులుగా మారుతున్నారు.. మీడియా నివేదికల ప్రకారం, సెంట్రల్ హార్లెం నగరంలో ఈ వ్యాధి కారణంగా ఆరుగురు మరణించినట్టుగా వైద్య ఆరోగ్య అధికారులు వెల్లడించారు. 100 మందికి పైగా ఈ వ్యాధి నిర్ధారించబడింది. ఇది లెజియోనెల్లా బ్యాక్టీరియా వల్ల కలిగే అరుదైన, తీవ్రమైన న్యుమోనియా అని న్యూయార్క్ నగర ఆరోగ్య శాఖ ప్రకటించింది. నగరంలోని అనేక భవనాలు, కూలింగ్ టవర్లలో వ్యాధి కారక బ్యాక్టీరియా గుర్తించబడిందని, దీనితో నివాసితులు అప్రమత్తంగా ఉండాలని ఆరోగ్య అధికారులు తెలిపారు.
ఇన్ఫెక్షన్ ఎలా వ్యాపిస్తుంది:
లెజియోనైర్స్ వ్యాధి అనేది లెజియోనెల్లా అనే బ్యాక్టీరియా వల్ల కలిగే తీవ్రమైన ఊపిరితిత్తుల ఇన్ఫెక్షన్ (న్యుమోనియా) అని ఆరోగ్య నిపుణులు అంటున్నారు. ఈ బ్యాక్టీరియా నీటిలో లేదా మట్టిలో కనిపిస్తుంది. శ్వాస ద్వారా శరీరంలోకి ప్రవేశిస్తుంది. లెజియోనెల్లా బ్యాక్టీరియా తేలికపాటి ఫ్లూ లాంటి అనారోగ్యం అయిన పోంటియాక్ జ్వరం వచ్చే ప్రమాదాన్ని కూడా కలిగిస్తుంది. పోంటియాక్ జ్వరం సాధారణంగా దానంతట అదే తగ్గిపోతుంది. అయితే, లెజియోనైర్స్ వ్యాధికి చికిత్స చేయకుండా వదిలేస్తే, అది ప్రాణాంతకం కావచ్చు. యాంటీబయాటిక్స్‌తో సత్వర చికిత్స వ్యాధిని నయం చేయగలదని వైద్యులు అంటున్నారు. కానీ కొంతమంది చికిత్స తర్వాత కూడా సమస్యలను ఎదుర్కొంటూనే ఉండవచ్చునని చెబుతున్నారు.
పిల్లలు, వృద్ధులు, బలహీనమైన రోగనిరోధక శక్తి ఉన్నవారికి ఈ ఇన్ఫెక్షన్ వచ్చే ప్రమాదం ఎక్కువగా ఉంటుంది. అందువల్ల ఈ వ్యక్తులు ప్రత్యేక జాగ్రత్తలు తీసుకోవాలని వైద్యాధికారులు సూచించారు. న్యూయార్క్‌లో లెజియోనైర్స్ వ్యాధి వ్యాప్తి చెందడంతో ఆరు మరణాలు సంభవించాయని, దాని లక్షణాలు, ప్రమాద కారకాలు తెలుసుకుని నివేదించారు. లెజియోనైర్స్ వ్యాధి ఊపిరితిత్తులను ప్రభావితం చేస్తుంది. ఇది న్యుమోనియా ప్రమాదాన్ని పెంచే ఇన్ఫెక్షన్.
దీన్ని ఎలా నివారించాలి?
ఈ వ్యాధి ప్రధానంగా ఊపిరితిత్తులను ప్రభావితం చేస్తుంది. అయితే ఇది గుండెతో సహా శరీరంలోని ఇతర భాగాలలో కూడా ఇన్ఫెక్షన్‌కు కారణమవుతుంది. ఈ బ్యాక్టీరియా కూలింగ్ టవర్లు, వేడి నీటి ట్యాంకులు, హీటర్లు, ఫౌంటైన్లు, స్విమ్మింగ్ పూల్స్‌లో ఉంటే అవి ఇన్ఫెక్షన్‌ను వ్యాప్తి చేస్తాయని నిపుణులు అంటున్నారు. ఆసుపత్రులు, నర్సింగ్ హోమ్‌లు క్రిములు సులభంగా వ్యాప్తి చెందే ప్రదేశాలు, నివాసితులు ఇన్ఫెక్షన్‌కు గురయ్యే ప్రమాదం ఎక్కువగా ఉంటుంది. మంచి పరిశుభ్రతను పాటించడం ద్వారా ఈ ప్రమాదాన్ని నివారించవచ్చు.
మరిన్ని అంతర్జాతీయ వార్తల కోసం ఇక్కడ క్లిక్ చేయండి..
