ఆర్థిక ప్రణాళికలో పెట్టుబడులు, మ్యూచువల్ ఫండ్లు, స్టాక్స్లపై ఎక్కువ దృష్టి పెడుతున్న ఈ కాలంలో ఒక కీలక విషయం చాలామంది నిర్లక్ష్యం చేస్తున్నారు. హెల్త్ ఇన్సూరెన్స్, ఎమర్జెన్సీ ఫండ్ అందులో ముఖ్యమైనవి. నిపుణుల ప్రకారం.. ఇవి సంపద పెంచే సాధనాలు కాకపోయినా, సంపదను కాపాడే అత్యంత ముఖ్యమైన రక్షణ కవచాలు. ఆరోగ్య బీమా వ్యక్తిని ఆరోగ్యవంతుడిని చేయదు కానీ అతని పొదుపులను రక్షిస్తుంది. నేటి వైద్య ఖర్చులు భారీగా పెరిగాయి. ఒక్కసారి ఆసుపత్రి ఖర్చు వచ్చినా సంవత్సరాల పొదుపు క్షణాల్లో ఖాళీ అయ్యే ప్రమాదం ఉంది.
ప్రమాదాలు, ఇన్ఫెక్షన్లు లేదా అనుకోని వ్యాధులు ఎవరికి అయినా సంభవించవచ్చు. కాబట్టి యజమాని ఇచ్చే పాలసీపై మాత్రమే ఆధారపడటం ప్రమాదకరమని ఆర్థిక నిపుణులు హెచ్చరిస్తున్నారు. ఉద్యోగ మార్పులు లేదా పాలసీ నిబంధనల మార్పులతో రక్షణలో ఖాళీలు ఏర్పడే అవకాశం ఉంది. ఇక అత్యవసర నిధి విషయంలోనూ స్పష్టత అవసరం. ఇది లాభం కోసం కాదు సమయం కొనుగోలు చేయడానికి. జీతం ఆలస్యం, వ్యాపార మందగమనం, ఇంటి అత్యవసర మరమ్మతులు వంటి పరిస్థితుల్లో ఈ నిధి కుటుంబాన్ని అప్పుల బారిన పడకుండా కాపాడుతుంది. పెట్టుబడులను అత్యవసర నిధిగా ఉపయోగించడం సురక్షితం కాదని నిపుణులు చెబుతున్నారు. మార్కెట్ పడిపోయిన సమయంలో పెట్టుబడులు విక్రయిస్తే నష్టాలు పెరుగుతాయి.
అందుకే ప్రతి కుటుంబం కనీసం ఆరు నెలల అవసరమైన ఖర్చులకు సరిపడే అత్యవసర నిధిని సిద్ధం చేసుకోవాలని సూచిస్తున్నారు. ఫ్రీలాన్సర్లు, వ్యాపారులు అయితే ఇంకా ఎక్కువ బఫర్ అవసరం. అలాగే ఆరోగ్య బీమా తీసుకునేటప్పుడు తక్కువ ప్రీమియం కాకుండా, నిజమైన ఆసుపత్రి ఖర్చులను దృష్టిలో పెట్టుకోవాలి. మొత్తానికి ఇవి ఆప్షన్స్ కావు, మిగతా అన్ని పెట్టుబడుల పునాది. ఏమీ జరగనిప్పుడు ఇవి నిరుపయోగంగా అనిపించవచ్చు. కానీ సంక్షోభ సమయంలో ఇవే కుటుంబ ఆర్థిక భద్రతను నిలబెడతాయని నిపుణులు స్పష్టం చేస్తున్నారు.
మరిన్ని బిజినెస్ వార్తల కోసం ఇక్కడ క్లిక్ చేయండి
