మనం వంట చేసే పాత్రల విషయంలో జాగ్రత్త వహించడం చాలా ముఖ్యం. భారతీయులు ఉక్కు, ఇనుము, ఇత్తడి, రాగి , అల్యూమినియం, మట్టి వంటి పాత్రలను సాధారణంగా ఉపయోగిస్తారు. ఈ పాత్రలలో వంట చేయడం వల్ల ఆహారం రుచి, పోషక విలువలు ప్రభావితమవుతాయి. సరైన పాత్రలను ఎంచుకోవడం వల్ల ఆహారంలోని పోషక విలువలు మరింత పెరుగుతాయి. అయితే కాలంలో వచ్చిన మార్పుల్లో భాగంగా ఈ రోజుల్లో వివిధ రకాల వంట పాత్రలు వంట గదిలో సందడి చేస్తున్నాయి. అయితే అవి ఆరోగ్యంపై ప్రత్యక్ష ప్రభావం చూపే లోహాలతో తయారు చేయబడుతున్నాయి. కనుక వంట చేసే విషయంలో జాగ్రత్త అని నిపుణులు హెచ్చరిస్తున్నారు. ఈ నేపధ్యంలో మళ్ళీ పూర్వకాలం అలవాట్ల వైపు మనిషి పయనిస్తున్నాడు. అందులో భాగంగా రాగి, ఇత్తడి పాత్రల్లో వంట చేయడం మొదలు పెట్టారు.
